Isko Moreno ipinahayag ang malasakit na plano para sa Maynila

Isko Moreno, Chie Atienza

SA muling pagtakbo ni Isko Moreno bilang alkalde ng Maynila, ipinahayag ng dating mayor ang kanyang malalim na dedikasyon at paninindigan upang ibalik ang kaayusan at kaunlaran sa lungsod.

Kasama ang kanyang kasamahan at tumatakbong Vice Mayor, si Chie Atienza, nagbigay siya ng mga pangako para sa mga Manileño at inilatag ang mga plano upang ipagpatuloy ang mga proyektong nagpasikat sa kanya noong kanyang nakaraang termino.

Ayon kay Isko, layunin nilang muling buhayin ang kalinisan at kaayusan sa Maynila.

“Lilinisin natin ulit ang Maynila. Naaawa ako sa mga taga-lungsod. Talaga namang dugyot na ulit ang Maynila ngayon,” sey ni Isko, na nagsalita tungkol sa kanilang misyon na gawing mas maayos at maginhawa ang pamumuhay sa Maynila.

Nakatuon sila sa pagpapaigting ng mga programang nagtataguyod ng disiplina at kaayusan sa buong lungsod.

Baka Bet Mo: Ninoy Aquino Stadium napuno TWICE in one day: Sigaw para sa pagbabalik ni Isko Moreno

Binigyang-diin din ni Isko ang mahalagang papel na ginagampanan nila ni Chie sa pagpapalaganap ng mga positibong pagbabago sa Maynila, sa kabila ng mga pagsubok at pagsasabing pinapabagsak sila ng mga hindi makatarungang paratang.

“Grabe, kung pader lang ‘yung mukha namin ni Chichi (Chie Atienza), malamang putik na,” saad ni Isko, patungkol sa mga paminsang pamumundok o mudslinging na ipinalabas laban sa kanila.

Gayunpaman, nananatili silang nakatuon sa kanilang layunin: “Kami, focus lang. Gamitin natin ‘yong pagkakataon na mapakinggan ng taumbayan.”

Ang kanilang misyon ay hindi lamang nakatuon sa kaayusan at kalinisan, kundi pati na rin sa pagpapabuti ng kalusugan, edukasyon, pabahay, at paglikha ng mas maraming trabaho para sa mga Manileño.

“Hindi na namin kailangang mangako ni Chi dahil alam naman ng mga taga-Maynila na nagawa na namin at uulitin na lang,” wika ni Isko, na nagsabing ang kanilang mga nagawa sa nakaraan ay magsisilbing batayan ng kanilang mga susunod na hakbang.

Pinagtuunan din ni Isko ang mahalagang papel ng pananampalataya sa kanilang pamumuno, at ang kanilang pagtitiwala sa Diyos bilang gabay sa bawat desisyon at hakbang.

“Basta Manila, God First,” sambit ni Isko, na ipinaliwanag na ang kanilang mga hakbang ay isinusuong sa paniniwalang ang Diyos ang magbibigay gabay sa kanilang misyon.

Sa kabila ng mga hamon, ipinagpatuloy ni Isko ang kanyang pangako na muling gawing maganda at maayos ang Maynila.

Kasama si Chie Atienza, ang kanilang grupo ay nakatuon sa pagpapabuti ng lungsod at pagtulong sa bansa sa pangkalahatan.

“Let’s make Manila great again,” aniya, naglalayong ibalik ang Maynila sa kanyang pinakamataas na antas ng pag-unlad at tagumpay.

Sa huli, umaasa si Isko na sa tulong ng mga Manileño, makakamit nila ang mga layuning ito at magagawa nilang maging modelo ang Maynila sa buong bansa.

“Ang Maynila ang magiging frontrunner ng nation-building,” sambit niya na nagpapakita ng pananaw na ang lungsod ng Maynila ay may mahalagang papel sa pagpapalago ng buong Pilipinas.