Mag-asawang senior citizen patay, nakainom ng rat killer na inakalang kape
PATAY ang mag-asawang senior citizen sa isang barangay sa Masbate matapos umanong makainom ng rat killer na napagkamalan nilang kape.
Wala nang buhay ang mga mga biktima nang matagpuan sa loob ng kanilang bahay, ayon sa mga rumespondeng mga pulis at imbestigador.
Base sa report ng Brigada, mahigit 24 oras na raw ang nakalipas bago pa matagpuan ng anak ng namatay na mag-asawa ang kanilang bangkay.
Ayon sa inisyal na pagsisiyasat, natagpuan sa kanilang kama ang 79-anyos na misis habang sa isang upuan naman sa kanilang lamesa nadiskubre ang bangkay na 80-anyos na mister.
Nabanggit sa report, base sa isinagawang imbestigasyon, wala raw nakikitang foul play ang mga otoridad sa pagkamatay ng mag-asawang senior citizen.
Ito’y matapos ngang matagpuan ng mga imbestigador ang rat killer o pamatay-daga na nasa tabi lang ng lalagyan ng kape. Malaki ang posibilidad na baka ito ang naitimpla at nainom ng mga biktima matapos napagkamalang kape.
Kasunod nito, nakumpirma din sa isinagawang pagsisiyasat na nakahalo ang nasabing rat killer sa ininom na kape ng mag-asawang biktima.
Disclaimer: The comments uploaded on this site do not necessarily represent or reflect the views of management and owner of Bandera. We reserve the right to exclude comments that we deem to be inconsistent with our editorial standards.