Netizens binatikos ang pagkawala ng ‘cool’ ni VP Sara: ‘Hindi propesyonal!’

PHOTO: Facebook/Inday Sara Duterte

USAP-USAPAN online ang kontrobersyal na pahayag ni Vice President Sara Duterte laban kina Pangulong Ferdinand Marcos Jr., First Lady Liza Araneta-Marcos, at House Speaker Martin Romualdez.

Sa isang press conference noong November 23, tahasang sinabi ni Duterte: “Sinabi ko sa isang tao, kung mapatay ako, patayin si BBM (Marcos), si Liza Araneta, at si Martin Romualdez. Walang biro. Walang biro.”

Mabilis itong kumalat online, kung saan umani ng batikos ang bise presidente dahil sa umano’y pagkawala ng kontrol at pagiging hindi propesyonal.

Maraming netizens ang nagpahayag ng pagkadismaya sa umano’y “reckless” at “hindi propesyonal” na pahayag niya. Narito ang ilan sa mga nabasa namin:

“Ang bigat ng salita niya. Ganitong asal ba ang dapat sa lider ng bansa? Nakakahiya!” sey ni @PinoyRealTalk.

Baka Bet Mo: PSC ‘pinaigting’ ang seguridad dahil sa bantang ‘kill order’ ni VP Sara

Lahad naman ni @JusticeForAllPH, “Kahit may pressure, hindi excuse ang pagbibitaw ng ganitong mga salita. VP pa naman siya!”

Ani ni @TruthBeTold88, “Nakakatakot isipin na ang mga ganitong pahayag ay normal sa mga opisyal natin.”

Samantala, may ilan ding nagtanggol kay Duterte at sinabing maaaring dala lamang ito ng emosyon. Heto ang mga nabasa namin:

Sambit ni @DefenderSara, “Kung ikaw kaya ang makakaranas ng banta sa buhay mo, hindi ka ba magagalit? Bigyan naman natin siya ng konting unawa.”

Lahad ni @Tagapagtanggol123, “VP Sara is just being human. Hindi niya sinasadya siguro, pero dapat maunawaan natin ang pinagdadaanan niya.”

Ang isyu ay mas uminit pa nang ito’y umabot sa TikTok, kung saan ilang viral videos ang nagpalaganap ng talakayan sa nakalipas na 24 oras.

Kagaya ng post ni @romeotvblogs na nagkaroon ng 2.1 million views ang kanyang ibinandera sa loob ng isang araw at umani ng 353 comments, na puno ng batikos at suporta.

May 23,500 views naman ang post ni @_balahura_016 at ang mga reaksyon dito ay pinaghalong kritisismo at pag-unawa.

Nakakuha ng 8,769 views ang shinare ni @9d.dump05 at pinag-usapan din sa comment section ang tila pagkawala ng kontrol ni Duterte.

Ang pinakamatunog na video, ay ang ibinandera ni @stephenli84 na may 3.6M views ay muling nagpaigting ng usapan.

Sa loob ng isang araw, umabot sa 43 milyon views ang mga hashtags na konektado sa isyung ito, kabilang na riyan ang  #SaraBaliwNa, #SaraMayTopak, #SaraIsipBata.

Baka Bet Mo: VP Sara ‘di na pinarusahan ang viral teacher na nanigaw ng mga estudyante

Pinapakita nito ang galit at pagkadismaya ng netizens sa tila “unprofessional” na pahayag ni Duterte. Ang mga komentaryo ay puno ng sarcasm at pagkondena:

“VP ba talaga ito? Para siyang bata magsalita.”

“May topak ata ang VP natin. Nakakaalarma na ito!”

Maraming balita rin ang naglabas ng mas detalyadong ulat tungkol sa isyu. Kabilang na riyan ang CNN (“Vice President Sara Duterte publicly threatens to have the president assassinated“) at Reuters (“Philippine VP’s assassination threat against president a national security matter“).

Ayon kay Jean Encinas-Franco, isang political analyst, ang ganitong pahayag ay may masamang epekto sa imahe ni Duterte:
“Hindi ito ang inaasahan mula sa isang lider. Ang ganitong asal ay nagpapakita ng pagkasira ng propesyonalismo at posibleng magpalala ng tensyon sa pagitan ng mga opisyal.”

Sinabi rin ni Franco na ang emosyonal na pahayag ay maaaring bunga ng matinding pressure na nararanasan ng VP, ngunit hindi ito rason upang maging padalos-dalos.

Habang patuloy ang talakayan sa social media, lalong nahahati ang opinyon ng publiko.

Ang iba ay nananawagan ng mas maingat na aksyon at pahayag mula kay Duterte, habang ang ilan naman ay nagpapakita ng simpatya sa bigat ng kanyang hinaharap.

Ang insidente ay nag-iwan ng marka hindi lamang sa pulitika kundi pati na rin sa pananaw ng publiko tungkol sa responsibilidad ng mga lider.

Sa bawat viral post at video, malinaw na nananatili ang isyu sa sentro ng diskurso online, na tiyak na susubaybayan pa ng sambayanan.