Cristy Fermin kay Vice Ganda: ‘Bakit hindi niya ako diretsuhin?’
Cristy Fermin at Vice Ganda
HINDI napigilan ng kolumnistang si Cristy Fermin ang pumalag sa mga patutsada umano ng Unkabogable Star na si Vice Ganda.
Ayon sa kolumnista, may mga pagkakataon daw talaga na hindi na siya makakapagpigil lalo na’t nagmamalabis na ang mga pasaring na kanyang natatanggap.
Panimula ni Cristy, “Sa maraming pagkakataon mga kapatid, pinalalagpas lang po namin ang mga bira sa amin nitong si Vice Ganda. Noong tinawag niya po kaming tatlo nina Wendell na mga chaka, gusto na naming sabihin na ‘Hiyang-hiya naman po kami sa kanya. Pagka-ganda ganda niya.’
“At gusto na rin po sana naming sabihin na kung hindi naman sa kanyang pera ay hindi siya magkakaroon ng ganyang itsura. At lalong gusto po naming sabihin lalo na ako na ang kagandahan po ng tao ay wala naman sa panlabas kundi nasa kalooban at pwede naming sabihin na siya sa panlabas at panloob, wala namang itinatagong ganda.”
Ang pinagmumulan ng kolumnista ay ang naging eksena sa segment na “Me Choose, Me Choose” ng “It’s Showtime” nitong Huwebes, November 23 kung saan isang contestant na nagngangalang “Cristy” ang tinanong niya kung ano ang pinagkakaabalahan nito maliban sa “pagsisinungaling”.
Bagamat walang diretsang tinukoy si Vice kung sino ang kanyang pinatutungkulan, gets naman daw ng kolumnista na siya ang pinatatamaan ng komedyante.
View this post on Instagram
“Hindi naman kami ipinanganak kahapon para hindi namin maturol na ako talaga ang pinatatamaan ni Vice Ganda. Ang hindi lang maganda puro patagilid ang kaniyang bira,” saad ni Cristy.
Aniya, bakit raw hindi pa diretsuhin ng “It’s Showtime” host kung sinuman ang gusto nitong patungkulan.
“Eh bakit hindi mo sabihin na, ‘Oy, Cristy Fermin, bukod sa pinagkakaabalahan mo, bukod sa pagsisinungaling ano pa pinagkakaabalahan mo?’ Eh ako diretso ko nasasabi sa kaniya na mayabang siya, ‘di ba? Na wala ka manlang makitang pagpapakumbaba sa kaniya. Diretso kong nasasabi yon, bakit hindi niya rin ako diretsuhin? Eh pu-pwede naman?” sey pa niya.
Nabanggit rin ni Cristy na kung siya ay nagsisinungaling ay bakit raw pinatawan ng suspensyon ng MTRCB.
“Kung ‘yun ay pagsisinungaling bakit kinatigan ang aking pagsisinungaling ng MTRCB at pinatawan kayo ng 12-day suspension? Bakit ang ating mga kababayan ay kumalaban rin sa ginawa n’yo? Bakit kinasuhan ka rin ng hanay ng mga abogado?
“Kung ang pagsisinungaling sa iyo ay masama, tama ‘yun pero kung ang pagsisinungaling ay pagsasabi ng katotohanan sa interpretasyon ng marami, dapat tanggapin mo,” banat ni Cristy.
HIrit pa niya, buhat raw nang makatikim ng kasikatan si Vice ay “inangkin” na raw nito ang mundo.
Giit pa ni Cristy, “Na ikaw ang gitna, na ikaw ang araw at umiikot lang ang lahat ng tao sa show business na parangmga planeta sa ‘yo. Dapat mong malaman na planeta ka lang rin na tulad namin at hindi ikaw ang araw.
“Isang araw, darating sa ‘yo ang pagbaba mo. Bababa ka sa pedestal. Hindi pupuwedeng nandyan ka habang panahon. May darating na mas magalig sa ‘yo st matatabunan ka.”
Disclaimer: The comments uploaded on this site do not necessarily represent or reflect the views of management and owner of Bandera. We reserve the right to exclude comments that we deem to be inconsistent with our editorial standards.