B-day wish ng Pinay beauty queen: maiuwi ang Miss Aura International crown
Si Alexandra Faith Garcia ang unang kinatawan ng Pilipinas sa Miss Aura International pageant./CONTRIBUTED PHOTO
IPINAGDIWANG ni Alexandra Faith Garcia ang kanyang ika-28 kaarawan noong Set. 5, at hangad niyang maiuwi ang unang korona para sa Pilipinas sa Miss Aura International.
Si Garcia ang magiging unang kinatawan ng Pilipinas sa pandaigdigang patimpalak, na magdaraos ng ika-16 nitong edisyon sa Oktubre sa Turkey.
Sa isang Facebook post, sinabi ni Garcia na, “As I receive the honor of becoming the first Miss Aura Philippines, I know that the title comes with great responsibility.”
Pagpapatuloy pa niya, “I will do my best to raise our flag in the Miss Aura International 2021 pageant.”
Ang Filipino-American designer na si Kathleen Katniss Griffiths mula California, ang national franchise holder para sa patimpalak, ang pumili sa triathlete, entrepreneur, agriculture advocate, at beterana ng pageants mula Olongapo City para sa Miss Aura International.
Makikipagtagisan si Garcia sa 29 iba pang kinatawan ng iba’t ibang bansa. Kokoronahan ni Andreia Correia ng Portugal ang bagong reyna sa Rixos Sungate Resorts sa Antalya, isang resort city sa Turkey, sa Okt. 5.
Disclaimer: The comments uploaded on this site do not necessarily represent or reflect the views of management and owner of Bandera. We reserve the right to exclude comments that we deem to be inconsistent with our editorial standards.