Lokal na kandidato sa Tarlac nanampal ng Comelec officer dahil sa posters

SUMAILALIM ngayong araw sa inquest proceedings ang abogadong si Marty Franz Toralba, na tumatakbong provincial board member, matapos ang isinampang kasong grave misconduct laban sa kanya dahil sa pananampal ng opisyal ng Commission on Elections (Comelec) sa Tarlac. 

Inaresto ng mga pulis si Toralba matapos sampalin si Teddy Mariano, 59, Comelec officer III, dahil sa pagtatanggal ng mga iligal na campaign posters sa Tarlac Linggo ng umaga.

Nakapinta ang mga campaign posters ni Toralba sa mga pader sa kahabaan ng sidewalk sa Sitio Camartinezan sa Malacampa at Cacamilingan Norte, Camiling, Tarlac, ayon sa pulisya.

Base sa ulat, pinagbantaan pa umano ni 

Toralba si Mariano matapos ang pangyayari.

“Kung may mamatay sa tao ko, may mamatay din sa tao mo. Lika at magsuntukan tayo,” sabi umano ni Toralba.

Pinagmumura pa umano ni Toralba si Mariano habang kapwa nasa police station.

Nirekomenda na ng pulisya sa Tarlac Police Provincial Office Validation Committee na ibilang ang insidente bilang  election related.

Tinangkang hingan ng pahayag si Toralba, bagamat hindi pa sumasagot.