Alma Moreno pinagtawanan, nilait, kinaawaan sa interview ni Karen Davila

NAG-viral pala itong si Parañaque councilor at ngayon ay senatorial bet na si Alma Moreno dahil sa kanyang interview noong isang linggo kay TV host Karen Davila.

Mixed ang reaction ng netizens sa umano’y naging “katawa-tawang” interview sa aktres.   Linggo ng gabi nasa ika-limang pwesto sa trending topic sa Twitter sa bansa ang naging panayam ni Karen kay Alma.

Maraming nag-okray kay Alma dahil sa walang direksyong mga sagot nito sa mga tanong sa kanya ni Karen.

“Nothing more awkward than the Alma Moreno interview,” ayon sa kay @nightingjaze.

“Si Alma Moreno yung never mong isasalang sa thesis defense. Kasi you’ll know that your grades are sealed,” sagot naman ng isa pa na si @aparadorprince.

Si Moreno ay tumatakbong senador sa ilalim ng  United Nationalist Alliance na pinangungunahan ni  Vice President at presidential aspirant Jejomar Binay.

Sa unang bahagi ng kanyang panayam, sinabi ni Alma na humingi pa muna siya ng mga signs kung tatakbo ba siya sa Senado dahil hindi anya bahagi ito ng kanyang mga plano.

Nagsimula ang “riot” sa interview nang usisain ni Karen kung anong adbokasiya ni Alma.

“More on sa kababaihan…Magna Carta for Women,” sagot ni Alma.

Nag-followup si Karen: “But then the law exists already.”

“Pero may mga bagay na hindi na-iimplement,” sagot agad ni Alma, na agad namang sinundan ni Karen ng: “Like what?”

Dito na tila nataranta ang aktres at napatawa na lang at sinabing “Teka muna.”

Nang tanungin naman hinggil sa reproductive health law, sinabi ni Alma na pabor siya rito pero with reservations.

Nang uriratin pa ng host, ang tanging nasagot lang ni Alma: “Kailangan pa ba sagutin yan?”, na sinagot naman ni Karen ng: “Of course you’re running for the Senate.”

“Kasi talaga ang mahihirap dapat mag kontrol kasi lalong naghihirap pag maraming anak,” hirit pa ni Alma.

Na tinanong naman ni Karen ng: “How would they control?”

“Kailangan bukas ang ilaw?, ” natatawang sagot ni Alma.

Naawa naman ang ilang netizens sa nangyari sa aktres.

“I pity Ms. Alma Moreno for this embarrassing interview with Ms. Karen Davila. She obviously has no idea what she’s getting herself into. The least she could’ve done is research and study before getting grilled. She must’ve been given a copy of the questions beforehand anyway. She’s no a political neophyte either to humiliate herself like this,” ayon kay Jayr Villegas sa Facebook.

“Karen Davila, when your guests speaks in Pilipino, you should adjust your questions to the language of your guest. Your body language is so negative! (Crossed arms and legs). I am not in favor of Alma’s senatorial run and I will never ever vote for her but please, be a gracious host. Your tone is very antagonistic,” ang post naman ni Minty Salonga.