Fans ni Angel imbiyerna kay Ate Vi, ang bilis bumaligtad

NEGATIBO ang pagtanggap ng mga fans ni Angel Locsin sa mga retratong magkasama sina Congresswoman Vilma Santos at Jessy Mendiola.

Ayon sa mga tagasuporta ng dating girlfriend ni Luis Manzano ay napakadali raw magbago ng kulay ni Congresswoman Vilma, napakabilis daw niyang bumaligtad, akala pa raw naman ng mga ito ay maganda pa rin ang kanilang samahan ngayon.

Hindi pa handa ang kalooban ng mga tagahanga ni Angel Locsin na makitang tinanggap na ng ina ni Luis ang bago nitong karelasyon. Hindi pa rin nakapagmu-move-on ang mga tagasuporta ni Angel sa paghihiwalay nila ni Luis.

Pero ginawa lang naman ng Star For All Seasons ang nararapat. Ipinakilala sa kanya ni Luis si Jessy, alangan namang bastusin niya ang dalaga, mas hindi karapat-dapat ang ganu’n.

Natural lang na dahil tao namang pumasok sa kanilang tahanan ang bisita ay tao rin itong tatanggapin. Alangan namang ipagtabuyan ni Congresswoman Vilma si Jessy, silang mag-ina naman ang magkakaroon ng problema, tama lang ang ginawa niyang pagtanggap sa dalaga.

Sabi nga ng isang nakausap namin, “Si Vilma pa ba naman ang maaasahan nilang mambastos, e, napaka-generous niya sa pagbibigay ng respeto sa lahat ng tao? Mag-move-on na lang kasi sila, para tapos na ang kuwento.”

Iba ang pangnakaraan sa pangkasalukuyan. Ganu’n lang kasimple ang istorya nina Angel, Luis at Jessy.