Melai binigyan ng standing ovation sa Your Face Sounds Familiar, wagi bilang Elizabeth Ramsey

NAGKAISA ang tatlong jurors ng reality talent show ng ABS-CBN na Your Face Sounds Familiar na ibigay ang pinakamataas nilang boto kay Melai Cantiveros sa naganap na showdown nitong weekend.

Binigyan ng standing ovation ng mga judge, ng studio audience at maging ng mga celebrity contestants si Melai matapos niyang gayahin ang singer-comedienne na si Elizabeth Ramsey.

Kinanta ni Melai ang signature song ng nanay ni Jaya na “Waray-Waray” at kahit kami ay na-shock sa kanyang performance, bukod sa kuhang-kuha na nito ang boses ni Elizabeth Ramsay, kopyang-kopya rin niya ang itsura ng komedyana.

At dahil dito, siya ang itinanghal na winner – bukod sa nakuha niya ang pinakamataas na puntos mula sa mga juror, siya rin ang nakakuha ng pinakamaraming boto mula sa kanyang mga kalabang celebrities.

Ang napanalunang P100,000 weekly prize ni Melai ay ido-donate niya sa Diocese of Marbel Alay Kapwa Social Action, isang simbahan na kumakalinga at tumutulong sa ilang mga nangangailangan nating kababayan.

In fairness, pati ang tinaguriang Philippines’ Queen of Rock and Roll na talagang pumunta pa sa studio ng YFSF ay bilib na bilib sa ginawa ni Melai.

“What can I say? Usually, whenever we see the performances, nagsusulat kami ng notes, But this time, wala akong naisulat kasi I don’t want to miss any minute, any second of your performance.

That performance was spotless. For me, the best performance you’ve ever done,” ang komento ni Jed Madela sa performance ni Melai. Sey naman ni Gary Valenciano, “Melai, you were awesome tonight.

You always are, pero ngayon, talagang, pareho kami ni Jed, wala kaming naisulat dahil it’s just perfect. Perfect!”  Ang sey naman ni Megastar Sharon Cuneta, nakasisiguro na si Melai na siya ang tatanggap ng kanyang eight points.

“Nauna na ako. I think eksaktong eksakto talaga ‘yung pagkakaganap mo kay Mama Beth. I had to keep checking kanina, meron bang flaw, meron ba kahit isang flaw, wala talaga. ‘Yung ‘pag sinabing perfect, perfect talaga.

So, congratulations Melai, you’re getting my eight points tonight,” chika pa ni Mega. And as usual, kulelat na naman sa laban si Maxene Magalona, talagang consistent naman siya sa pagiging talunan.

Naiisip kaya ni Maxene na hindi na lang sana siya sumali sa nasabing reality talent show dahil wala naman talaga siyang talent pagdating sa pagkanta, pagsasayaw at panggagaya?