Jake na-bad trip sa kadaldalan ni Albie

USAP-USAPAN ngayon sa social media ang pagresbak ng anak ni Mayor Erap Estrada na si Jake Ejercito sa mga pinagsasabi ni Albie Casino tungkol sa kanila ni Andi Eigenmann.

Ayon kay Jake, ginagamit lang ni Albie ang isyu sa kanila ni Andi para mag-ingay at mapag-usapan. Pinagsabihan pa nito ang TV5 talent na huwag namang gamitin ang anak ni Andi para lang may maisulat ang mga reporter tungkol sa kanya.

Kung matatandaan, nang matanong si Albie tungkol sa tsismis na si Jake raw ang tunay na ama ng anak ni Andi na si Ellie, sinabi nitong, “If you have a secret, you can’t keep it hidden forever.”

Si Albie kasi ang itinuturo ni Andi na tatay ng kanyang anak pero hindi ito pinanindigan ng binata. Kahapon sa isang popular website, marami ang nakabasa sa naging pahayag ni Jake tungkol kay Albie.

Isang follower kasi ng boyfriend ni Andi ang nagtanong ng, “What can you say about Albie’s statement that you might be the father of Ellie?”

Ang naging sagot naman ng anak ni Erap, “As much as I wouldn’t wanna recognise such a futile statement with a reply, it’s never right to involve the innocent, specially when it’s a kid.

“Ellie shouldn’t be an embarrassment to anyone. She or anyone from her side has never bothered anyone for anything. It’s a shame some people choose to use a sweet little ball of awesomeness in nothing but a desperate showbiz promo ploy,” dagdag pa nito.

Kung si Jake Ejercito nga ang nag-post ng nasabing message, may point naman siya, kahit kami ay medyo na-turn off kay Albie nang idamay pa niya sa usapan ang anak ni Andi.

Batambata pa si Ellie at hindi naman tama na makaladkad din siya sa isyu ng kanyang ina at ng mga lalaki sa buhay nito.