Planong ganti sa zero remittance week ng OFWs hindi kinagat ni Chiz
Chiz Escudero
HINDI sang-ayon si Senate President Francis “Chiz” Escudero na gantihan ang overseas Filipino workers (OFWs) na susuporta sa binabalak na “zero remittance week.”
Unang sinabi ni Presidential legal counsel Juan Ponce Enrile na maaring kanselahin ng gobyerno ang pribilehiyo sa buwis ng OFWs kung itutuloy ang balakin bilang protesta sa pag-aresto kay dating Pangulong Duterte.
Paliwanag ni Escudero tanging ang Kongreso lamang ang makakagawa sa nais ni Enrile at hindi ito maaaksyunan dahil suspendido ang sesyon sa Senado at Kamara.
Bukod dito, iginiit ng senador na hindi siya pabor na bawian ng OFWs dahil hindi ito makakatulong sa kasalukuyang sigalot.
Dapat aniya ay lawakan ang pag-iisip at pang-unawa ng lahat.
Hinikayat niya ang OFWs na humanap ng ibang paraan sa pagpapahayag ng kanilang saloobin dahil pamilya ng mga ito ang lubhang maaapektuhan sa hindi pagpapadala ng remittance.
Disclaimer: The comments uploaded on this site do not necessarily represent or reflect the views of management and owner of Bandera. We reserve the right to exclude comments that we deem to be inconsistent with our editorial standards.