Revival King Jojo Mendrez sinorpresa ni Mark sa presscon; bakit naiyak?

Jojo Mendrez, Jonathan Manalo at Mark Herras

AYAW nang magsalita pa ng tinaguriang The Revival King na si Jojo Mendrez tungkol sa malilisyosong chika sa kanila ng actor-dancer na si Mark Herras.

Humarap sa members ng entertainment media ang singer kahapon pagkatapos  pumirma ng kontrata sa Star Music PH. Nakasama sa contract signing ang mga executive ng Star Music na sina Roxy Liquigan, Jonathan Manalo at Andie Arellano.

Sa Q&A session, natanong nga si Jojo kung kumusta na sila ni Mark matapos mabigyan ng kulay at ibang kahulugan ang pagkikita nila sa isang hotel casino kamakailan.

“No comment” na ang sagot ng OPM artist dahil, “Kasi kahit sabihin kong hindi, walang ganu’n (relasyon), iba pa rin ang paniniwalaan nila. So, saan ako lalagay? Kasi sa social media, ang mga tao ang daling mag-judge. Kung ano yung nakikita nila, yun na yun.

“Hindi ko naman pwedeng i-explain to everyone, ito ang totoo, ito ang ganyan kaya sabi ko huwag na lang akong mag-comment tungkol diyan. Siguro kung makita n’yo siya, sa kanya n’yo na lang tanungin.

“Kasi sa aking side, ang dami ko nang pinagdaanan, family ko affected, tapos mga kaibigan ko tawag nang tawag sa akin. Pag-open ko ng cellphone ko, mukha ko agad ang makikita sa Google, sa Facebook, sa lahat.

Baka Bet Mo: Jojo Mendrez sa isyung may ‘something’ sila ni Mark Herras: Nawindang ako!

“So, kumita naman ang marami sa social media, ang mga vloggers, so sa akin, hayaan na lang. Siguro one day, malalaman n’yo rin naman kung ano ang totoo,” pagbabahagi ni Jojo.

Kasunod nito, kinanta ni Jojo ang kanyang bagong hugot song na “Nandito Lang Ako” under Star Music composed by Jonathan Manalo. At bago matapos ang kanta ay biglang umapir si Mark sa venue ng event at binigyan ng flowers si Jojo.

Palakpakan at tilian ang lahat ng nasa presscon sabay sigawan ng, “Ang sweet!” Agad ding umalis si Mark pagkaabot ng bulaklak kay Jojo kaya hindi na namin siya nakachikahan.

After ng song number ng Revival King, in-announce ng mga host na baka hindi na maipagpatuloy ni Jojo ang Q&A dahil biglang sumama ang pakiramdam nito.

Sa pamamagitan naman ng isang official statement ay ipinaliwanag ng talent management ng singer na Aqueous Entertainment.

“To our dear guests last night, thank you for your support and making our Media Con successful and memorable for Jojo.

“We sincerely apologize if we cut the program short last night. Due to overwhelming atmosphere, Jojo had to excuse himself because of hyperventilation.

“But rest assured he’s ok now and in good shape. Sorry po sa mga hindi nakapagtanong kagabi, but I hope you all had a good time. Maraming salamat po sa inyong lahat!

“Sincerely,

“AQUEOUS ENTERTAINMENT.”

Samantala, simula pa lamang ng mediacon ay umiyak na si Jojo dahil sa overwhelming support sa kanya ng entertainment media. Pinakalma muna siya ng kanyang team bago umupo sa presidential table para sa Q&A.

Sa mga hindi pa masyadong aware, si Jojo ang nag-revive ng kanta ng yumaong actress-singer na si Julie Vega, ang “Somewhere In My Past” composed by Mon del Rosario na present din sa naganap na presscon.