Ex-mayor ng Lamitan, Basilan, 2 pa patay sa pamamaril sa Ateneo campus, 1 estudyante sugatan; PBBM ‘shocked’
Isang ambulansiya ang dumating sa Ateneo de Manila University campus
TATLO ang nasawi, kabilang na ang dating mayor ng Lamitan, Basilan na si Rose Furigay, sa naganap na pamamaril sa Ateneo de Manila University (ADMU) campus sa Quezon City ngayong araw.
Kasamang namatay ng dating alkalde ng Lamitan ang kanyang long-time aide na si Victor Capistrano at isa pang security guard.
Ang anak naman ni Furigay na si Hanna Rose na kabilang sana sa mga estudyanteng tatanggap ng kanyang diploma sa ginaganap na graduation ceremony sa ADMU ay sugatan matapos ang madugong insidente.
Ayon kay Quezon City Police District Director BGen. Remus Medina, naganap ang pamamaslang dakong alas-2 ng hapon.
Ito’y base na rin sa salaysay ng mga graduating students na nakarinig ng mga putok ng baril sa Areté Building.
Naaresto naman daw agad ang suspek ngunit hindi pa nila isinasapubliko ang pagkakakilanlan nito habang isinagawa pa ang ibayong imbestigasyon.
Ayon pa sa ulat, nangyari ang pamamaril bago ang nakatakdang 4 p.m. commencement exercises ng Ateneo Law School.
“Someone shot a bodyguard and girl na binabantayan nila and everyone fled away from the incident. After that may successive shots pa outside and inside Areté,” ang pagbabahagi ng isang estudyante sa panayam ng ABS-CBN.
Base naman sa social media post ng The GUIDON, ang student publication ng ADMU, naka-lockdown na ngayon ang buong campus habang iniimbestigan ng PNP at NBI ang insidente pati na ang crime scene.
Kinansela na rin ng ADMU ang graduating rites ng Ateneo Law School, “Ateneo is continuing to work with the police and other authorities to deal with the incident.”
Samantala, naglabas din agad ng official statement si President Ferdinand “Bongbong” Marcos, Jr. hinggil sa naganap na pamamaslang.
“We are shocked and saddened by the events at the Ateneo graduation today. We mourn with the bereaved, the wounded, and those whose scars from this experience will run deep.
“We commit our law enforcement agencies to thoroughly and swiftly investigate these killings and bring all involved to justice.
“Our prayers go to the graduates, their families, the Ateneo community, and to the residents of Quezon City and Basilan,” mensahe ng Pangulo.
Napag-alam din na hindi na pinatuloy si Chief Justice Alexander Gesmundo sa nasabing event kung saan siya sana ang magsisilbing graduation speaker.
Sabi ni Supreme Court spokesperson Brian Keith Hosaka, “The Chief Justice is safe.”
Kinondena rin ni Quezon City Mayor Joy Belmonte ang nangyaring karahasan sa Ateneo, “We also extend our sincerest condolences to the families and loved ones of the victims who lost their lives in the incident.”
Dagdag pa niya, mas paiigtingin nila ang seguridad sa buong Quezon City para masigurong walang mangyayaring karahasan sa unang State of the Nation Address (SONA) ni Pangulong Bongbong bukas, July 25.
Disclaimer: The comments uploaded on this site do not necessarily represent or reflect the views of management and owner of Bandera. We reserve the right to exclude comments that we deem to be inconsistent with our editorial standards.