Alden kay Jasmine: Sabi ko, ang sarap namang makasama nito bilang partner…dream come true

TANGGAP na tanggap na ng mga fans ng Asia’s Multimedia Star na si Alden Richards ang tambalan nila ng award-winning actress na si Jasmine Curtis.

Kaya naman muli silang binigyan ng bonggang project ng GMA pagkatapos ng matagumpay nilang mini-series na “Love on The Balcony,” sa drama anthology na “I Can See You.”

Bibida uli ang dalawa sa upcoming GMA Telebabad series na “The World Between Us” na magsisimula na sa July 5 na papalit sa “First Yaya.”

In fairness, matinding challenge rin ang pinagdaanan nina Alden at Jasmine bilang loveteam lalo na noong kasagsagan ng pangnenega sa kanila ng ilang fans nina Alden at Maine Mendoza.

Pero napatunayan nga nila na hindi nagkamali ang GMA sa pagtitiwala sa kanila dahil minahal na rin sila ng publiko at patuloy na sinusuportahan.

Sa ginanap na virtual mediacon ng GMA para sa “The World Between Us”, natanong si Alden kung ano ang reaksyon niya sa mainit na pagtanggap sa loveteam nila ni Jasmine.

“Siguro lately nag-e-evolve ang audience, e, that’s what I can see. And slowly nabe-break na ‘yung stigma na you don’t really have to be romantically together off-cam to be effective as actors.

“I guess, Jas and I, conscious effort namin as actors to make it seem na to be our characters, and for our characters to be in love with each other,” sey ni Alden.

Patuloy pa ng Pambansang Bae, “This is a good team-up, at least parang nakikita na natin ngayon ‘yung evolution na ‘yung audience must be in love with the story, not the actors off-cam.

“That’s the thing about Jas, I’m very comfortable with her, I’ve done quite a few projects with her already, and this is a dream come true for me,” aniya pa.

Bago nagtambal sa “I Can See You: Love on the Balcony”, una nang nagkasama sina Alden at Jasmine sa pelikulang “Imagine You and Me” noong 2016.

“After being with her sa ‘Imagine You and Me,’ parang sabi ko ang sarap naman makasama nito sa isang project as a partner.

“So I guess this is the time for it, this is the perfect time. I mean, so far, so good, we’re on the right track and we’re being able to deliver our characters in this story that we’re very much in love with,” aniya pa.

Samantala, para naman kay Jasmine, ang secret sa tagumpay ng on-screen chemistry nila ni Alden ay ang makatotohanan at natural na pagganap nila sa kanilang mga karakter.

“Agree naman ako with Alden that pareho kaming in love sa characters namin, pareho kaming in love sa story nilang dalawa,” sey pa ni Jasmine.

“And that makes the chemistry so much easier kasi ramdam mo ‘yung kilig ng character mo, dinadaanan mo rin with the character.

“And, like Alden said, kami ngang dalawa, we’ve done projects before, though dalawa ‘yun and short period lang ‘yung aming working tandem, it was still enough to build a good foundation para maibigay namin more for this project and mas ma-develop pa ‘yung chemistry na nasimulan na from before.

“I’m grateful kasi it’s been so fun and it’s been so easy to work with Alden and to have that and to share that chemistry with him,” lahad pa ni Jasmine.

Makakasama rin sa “The World Between Us” sina Tom Rodriguez, Jaclyn Jose, Dina Bonnevie, Sid Lucero, Kelley Day, Yana Asistio, Don Boco at Jericho Arceo, sa direksyon ni Dominic Zapata.