Vice ‘nag-walkout’ sa opening ng Showtime: Kailangan kong um-exit sa point na ‘yun para umiyak

“NAG-WALKOUT” si Vice Ganda habang nagpe-perform kaninang tanghali para sa opening number ng It’s Showtime.

Sa kabila ng kanyang positibong pananaw matapos ang tuluyang pagpapasara sa ABS-CBN, hindi na rin kinaya ng TV host-comedian ang bigat ng kanyang kalooban.

Habang kumakanta on stage, may pagkakataon na hindi na niya mabigkas ang mga lyrics at halatang pinipigil lang ang kanyang emosyon.

Sa kalagitnaan ng kanyang performance kasama ang iba pang hosts ng Showtime, bigla na lang tumalikod si Vice at umalis ng stage.

Ilang sandali ang nakalipas, nag-tweet ang Phenomenal Box-Office Star at humingi ng paumanhin sa madlang pipol.

“Kailangan kong umexit sa point na ‘yun para umiyak. I couldn’t fake it. Pero ok nako after humagulgol,” ani Vice Ganda.

Kagabi, isa ang komedyante sa mga Kapamilya stars na nagpahayag ng pagkadismaya sa naging desisyon ng Kongreso na huwag nang bigyan ng bagong prangkisa ang Dos.

“Ang ABS-CBN, ang serbisyong ibinigay niya ay naging malaking bahagi ng araw-araw na buhay ng mga Pilipino. Napakalaking bahagi.

“Tungkol ito sa ating lahat. Hindi ito tungkol lang sa mga taga-ABS-CBN, sa mga artista. Tungkol ito sa ating lahat. Tungkol ito sa buhay natin,” aniya sa panayam ng ABS-CBN.

Nag-tweet pa siya bago ang ginanap na botohan ng mga kongresista, “It’s a show! At lahat yan pre show lang. Actually masyado na ngang mahaba kasi andaming nagpabibong magfront act. Now it’s the main event.

“Let’s watch and be amazed as the LORD GOD performs.”