Ika-6 diretsong PBA season MVP award nakuha ni Fajardo
JUNE Mar Fajardo
NAGTAMO man ng shin injury, hindi naman nito napigilan si San Miguel Beermen center June Mar Fajardo na kunin ang kanyang rekord na ikaanim na diretsong PBA season Most Valuable Player award Linggo sa ginanap na PBA Leo Awards sa Smart Araneta Coliseum.
Hinatid ang San Miguel Beer sa dalawang korona sa nakalipas na season, kabilang ang ikalimang sunod na all-Filipino title, tinalo ni Fajardo sa parangal sina Jayson Castro ng TNT KaTropa, Christian Standhardinger ng NorthPort Batang Pier at Christian Jaymar ‘CJ’ Perez ng Columbian Dyip.
Nanguna rin si Fajardo sa Mythical First Team na kinabibilangan din nina Castro, Standhardinger, Perez at Sean Anthony ng NorthPort.
Kumulekta rin si Perez ng dalawa pang tropeo matapos tanghaling Rookie of the Year at makapasok sa All Defensive Team.
Unang pagkakataon naman ang pagpasok ni Anthony sa Mythical First Team. Nakapasok din siya sa All-Defensive Team kasama sina Fajardo, Perez, Japeth Aguilar ng Barangay Ginebra Gin Kings at Chris Ross ng San Miguel Beer.
Kabilang naman si Aguilar, ang Finals MVP ng 2019 PBA Governors’ Cup, sa Mythical Second Team kasama ang kakamping si Stanley Pringle, TNT KaTropa stars RR Pogoy at Troy Rosario at Ian Sangalang ng Magnolia Hotshots.
Tinanghal naman si Moala ‘Mo’ Tautuaa bilang Most Improved Player award matapos ang kanyang breakout season sa NorthPort at San Miguel Beer, na kumuha sa kanya sa isang trade kapalit ni Standhardinger noong nakaraang taon.
Nauwi naman ni Rain or Shine forward Gabe Norwood ang ikatlong diretsong Samboy Lim Sportsmanship award.
Disclaimer: The comments uploaded on this site do not necessarily represent or reflect the views of management and owner of Bandera. We reserve the right to exclude comments that we deem to be inconsistent with our editorial standards.