Trader na natalo sa suntukan inararo ang 3 motorsiklo: 1 patay, 6 pa sugatan 

PATAY ang isang 20-anyos na lalaki, samantalang sugatan naman ang anim na iba pa matapos na araruhin ng isang negosyante gamit ang kanyang kotse, ang tatlong motorsiklo sa Cauayan, Isabela alas-4:30 kaninang umaga, ayon sa pulisya.

Bago nito, nakipag-away ang suspek na si Aaron Christian Reyes, 22, sa nagmamaneho ng motorsiklo na si Jake Anthony Macadangdang.

Sinagasaan umano ni Reyes ang biktima sa kanto ng Golden Shower st. sa barangay San Fermin.

Sugatan din ang mga binatilyong sakay ni Macadangdang na sina Johnmark Sanchez, 19, at Bryan Barroga, 16.

Inararo rin ng kotse ang pangalawang motorsiklo na sakay sina Robie Sinnott, 20, at Ericka Jesura, at ang ikatlong motorsiklo na minamaneho ni Derik Villafuerte at sakay naman si Daryl Ordonez.

Dinala ang anim na biktima sa Ester Garcia Medical Hospital sa lungsod para magamot.

Hinabol ni Reyes ang mga motorsiklo matapos namang matalo sa suntukan, ayon kay  Senior Inspector Frances Littaua, Isabela police spokesperson.

Unang sinagasaan ng suspek ang motorsiklo ni Macadangdang at pagakatapos ay hinabol naman ang iba pang biktima.

Naaresto ng pulisya si Reyes,  kasama ang sakay ng kotse na si Hugiebert Moico, 28.

Nahaharap siya sa patong-patong na mga kaso, kasama na ang murder, multiple frustrated murder at damage to property.