Pamilya ni Bong halos sa kulungan na nakatira; Lani ayaw iwanan ang asawa

Linggo nang hapon ay dumalaw uli kami kina Senador Jinggoy Estrada at Senador Bong Revilla sa PNP Custodial Center. Tulad nang dati ay kumpleto ang kanilang mga pamilya, maraming kaibigang hindi nakalilimot sa kanila, pero ramdam na ramdam ang lungkot sa paligid.

Kuwento ng mga kapatid ni Senador Bong, mula nang ibasura ng Sandiganbayan ang hiling ng senador na makalaya habang dinidinig ang mga kasong isinampa laban sa kanya ay araw-araw na silang nasa Camp Crame, inaalalayan nila ang aktor-pulitiko.

Kuwento ni Rowena, “Kailangan namin siyang samahan palagi, iba pa rin ‘yung nararamdaman niya na maraming nagmamahal sa kanya.

Mabuti na lang, dumating ito sa kapatid namin sa isang time na matibay na ang faith niya sa Diyos.” Mas madalas silang nasa Custodial Center ngayon kesa sa kanilang ama na nasa Cavite.

Naiintindihan naman ng dating senador ang sitwasyon, mas kailangan ngayon ni Senador Bong ng kausap, dahil sa kabiguan niyang makapagpiyansa.

Sabi naman ni Princess, “Lagi naman naming kausap si daddy. Okey naman siya, palagi niyang sinasabi sa amin na magdasal lang para maging maayos ang sitwasyon ng kapatid namin.”

Masakit man para kay Senador Bong ang nangyari ay nababalanse naman ‘yun ng pagmamahal ng kanyang pamilya, halos du’n na namamalagi si Congresswoman Lani Mercado at ang kanilang mga anak, pati ang staff ng senador ay palaging nasa tabi niya.