Ivana sa unang pagtapak sa Pinas: May dagang malaki, nagliliparan mga ipis!

Ivana Alawi

MUNTIK nang sukuan ng aktres at sexy content creator na si Ivana Alawi ang paninirahan sa Pilipinas mula sa Bahrain kung saan siya isinilang at lumaki.

Napakarangya ng buhay ni Ivana sa Bahrain noong kanyang kabataan kasama ang kanyang nanay na si Fatima at dalawang kapatid.

Pero nagdesisyong bumalik sa Pilipinas ang nanay ng aktres nang mahiwalay ito sa kanyang ama. Kasunod nito, umalis si Ivana sa Bahrain at sinundan ang ina sa Pilipinas kahit mag-isa lang.

Naikuwento ng aktres sa nakaraang episode ng “Kapuso Mo, Jessica Soho” tungkol sa naging buhay niya noong kanyang kabataan. Aniya, nagkakilala sa Bahrain ang ina niya at amang Moroccan businessman na si Samier.

“Sobrang maganda ‘yung buhay namin doon. Tapos malaking-malaking bahay, malaking room,” pagbabahagi ni Ivana.

Dahil sa palagi nang nagkakaalitan ang mga magulang, nagdesisyon na ang mga ito na maghiwalay na. Buntis si Fatima sa bunsong anak na si Mona nang bumalik sa Pilipinas.

Naiwan si Ivana at ang dalawang nakatatandang kapatid sa kanilang tatay
Patuloy ng aktres, “Nagdala na siya ng girlfriend na bagets (sa bahay). Ako hindi ko matanggap.

“Ano ito? Papalitan mo ‘yung nanay ko? Sabi ko, no, no, no! No one’s gonna replace my mom. So sabi ko sa tatay ko, I will follow my mother,” lahad ni Ivana.

Sa pagkakatanda ng dalaga, mga 5 o 6 years old siya nang mag-isang pumunta sa Pilipinas, “Sabi ng tatay ko, ‘Hindi kita mahahatid,,’ kasi ang dami niyang trabaho. Wala sa mga kapatid ko ang may gusto pumunta ng Pilipinas.

“Nilagyan ako ng pera sa bulsa ko, ‘Huwag mo gagalawin ‘yan ah.’ Pagdating sa Pilipinas, nanay mo ang kukuha.’ Wow! Sabi ko, ‘delivery girl,’” natatawang chika pa ng Kapamilya actress.

Na-shock si Ivana nang madiskubre ang kalagayan ng kanyang ina, “Pagkakita ko po ng bahay, promise po. Wala kaming ref. Hindi kami kasya roon sa bedroom po.

“Kasi tatlo kami. Ako, si Mona, tapos ‘yung mama ko. Tapos kailangan naka-curve ‘yung paa kasi malit na malit lang po ‘yung room.

“Tsaka nakakita ako ng ipis, dagang malaki. Kasi nasa tabi kami ng kanal. Nagliliparan pa ‘yung mga ipis. Nasabi ko, ‘Ayoko na dito,’” pag-alala pa ng dalaga.

“Tapos sabi ko sa mama ko talaga, ‘Mama, iniwan mo kami para dito? Bakit?’ Tapos sabi niya, ‘mas masaya ako dito.’ Hindi talaga siya about sa pera.

“Sabi niya, kung sa pera lang, ito sana nagtiyaga ako roon, sana tiniis ko lahat ng mga sakit. Pero it’s not about the money. Sometimes, ang happiness, hindi nabibili ng pera,” pagbabahagi pa ng sexy actress.

Naichika rin ng dalaga ang mga naging experience niya sa pakikipaglaro sa mga kapwa bata sa kanilang lugar. Ibang-iba raw ang naging buhay niya roon kumpara sa Bahrain na schook at bahay lang ang drama niya.

Lahad ni Ivana sa mga naranasan sa paglalaro sa kalye, “Paglabas ko, may mga nagtatakbuhan na mga bata. Nakagano’n lang ako, ‘Mama, hindi ako marunong. Paano? English speaking pa.

“Ang sabi, ‘Anong sinasabi mo? Arte mo naman.’ ‘I don’t understand you guys.’ Ganon-ganon pa ako. Arte. Inglisera, hindi ako marunong mag-Tagalog,” sey ni Ivana habang tawa nang tawa.

Pagbabalik-tanaw pa niya, “May isang bata, katakbo niya. Arte arte sa akin, tinusok ‘yung tainga ko. So ,nabutas siya, ganiyan. Sabi ko, ‘Wah!’ dugong-dugo. ‘Yung nanay ko, inatake na naman. Halika na magpunta tayo sa ospital.'”

Nang tumagal na siya sa Pilipinas, nasabi niyang isa pala itong “paradise”, “As time went by, dahan-dahan, nagkaroon na ako ng maraming friends. Tapos sabi ko sa kapatid ko, mga kapatid ko, ‘Uy, ang ganda dito. Paradise.'”

Pero nang mapilit daw niyang magtungo sa Pilipinas ang ate at kuya niya, “Galit na galit sila pagdating, ‘Paradise? Paanong nangyari?’ Sabi ko guys, exprience n’yo, try n’yo siya ng ilang taon. Hanggang lahat po kami hindi na umuwi (sa Bahrain). Nag-enjoy na po talaga kami dito.”

Wala naman daw galit o sama ng loob si Ivana sa kanyang ama kaya nang magkasakit ito ay talagang pinuntahan  niya ito nang personal. Nakausap pa niya ito habang nakaratay sa Subic, Zambales bago tuluyang mamaalam.