Ivana miss na miss na ang housemates: Ihahanda ko na ang luto ko para sa inyo

Ivana Alawi

TODO-TODO ang pasasalamat ni Ivana Alawi sa ABS-CBN dahil natupad na nga ang matagal na niyang pangarap na maging “Pinoy Big Brother” housemate.

Habangbuhay daw niyang ite-treasure ang naging experience niya bilang guest celebrity housemate sa “Pinoy Big Brother Celebrity Collab Edition” na napapanood na rin ngayon sa Kapuso Network.

Ayon kay Ivana, napakarami niyang natutunan sa loob ng Bahay ni Kuya kahit ilang araw lamang siyang namalagi roon at isa nga ito sa katuparan ng matagal na niyang pinapangarap.

Nitong weekend, natapos na ang kanyang journey bilang “boarder” ni Big Brother at sa pamamagitan ng kanyang Instagram account, nagbigay siya ng mensahe sa lahat ng kanyang fans and social media followers.

“Isa sa mga pangarap ko ang maging housemate sa bahay ni Kuya. Kaya malaki ang pasasalamat ko sa PBB dahil naexperience ko maging housemate kahit bilang house guest lang.

“Salamat din sa ABS CBN for making it happen,” ang mensahe ng sexy actress at vlogger.

Miss na miss na rin daw niya ang mga nakasama niyang celebrity housemates, “Andami kong realizations sa loob, andami kong natutunan, at babaunin ko lahat yun ngayon sa outside world.

“Hindi lang experience ang na-gain ko sa bahay ni Kuya kundi ay isang Pamilya. Ngayon pa lang sobra ko na silang miss. Ihahanda ko na ang luto ko para sa inyo,” dagdag pa ni Ivana.

In fairness, pak na pak naman talaga ang special appearance ni Ivana sa pinakabagong edisyon ng “PBB” dahil sa mga nakakalokang eksena niya sa loob.

Ate-ate ang peg ni Ivana sa Big Brother house pero pansin na pansin ng mga manonood ang kakaibang tingin at pakikipag-usap sa kanya ng mga male housemates.

Pati nga ang pagbibigay ng tubig ng isa sa mga host ng “PBB” na pinapasok din ni Kuya sa loob ng kanyang bahay na si Mavy Legaspi kay Ivana ay binigyan ng malisya ng mga netizens.

At ito pa nga, napagalitan pa ang sexy actress at na-buzzer pa dahil naligo siya sa garden ng PBB house gamit ang pangdilig ng mga halaman.

“Eto na po, ayoko na, sige na,” ang maririnig na dialogue ni Ivana nang malamang bawal ang kanyang ginawa.