Regine tinupad ang pangarap ng US singer, nag-duet sa ‘A Million Dreams’
PHOTO: Instagram/@lorenallred
IBA rin talaga si Asia’s Songbird Regine Velasquez dahil pinatunayan niya na hindi lang siya isang alamat sa OPM, kundi pati na rin sa mundo.
Kamakailan lang, tinupad ni Regine ang matagal nang pangarap ni Loren Allred, isa sa kanyang at kilalang American singer.
Ito ay matapos magsanib-pwersa sila sa isang makapangyarihang rendition ng “A Million Dreams,” isang kanta mula sa sikat na musical film na “The Greatest Showman.”
Sa isang Instagram post, hindi maitago ni Loren ang kanyang excitement at kilig habang proud na ibinabandera ang collaboration nila ng batikang singer.
Sa kanyang post, ipinaabot niya ang paghanga sa Songbird at tinawag itong isa sa kanyang “all-time favorite voices” at “one of the greatest singers of all time.”
Baka Bet Mo: Regine Velasquez naghahanda na sa retirement, type mag-travel nang mag-travel
“The legendary @reginevalcasid is one of my all-time favorite voices and hands down one of the greatest singers of all time,” bungad niya sa caption.
Aniya pa, “I still can’t believe that I get to announce that TONIGHT, I’m releasing our version of ‘A Million Dreams’.”
Sa parehong post, ibinahagi rin ni Loren na matagal na niyang idolo si Regine.
Pinasalamatan niya rin ang Filipino-American musician na si Troy Laureta na naging daan kaya niya napakilala ang Asia’s Songbird.
“Singing with one of my idols used to feel totally out of reach, but tonight, I’m just smiling and so grateful that dreams really do come true,” sey ng American singer.
Wika pa niya, “Big thanks to @troylaureta for making this duet happen. And to everyone out there, keep dreaming big and remember. anything is possible. Thank you @reginevalcasid! Hope you all love our duet.”
View this post on Instagram
Bago ang naturang collab, una nang nagbigay-pugay sina Loren at Troy kay Regine noong November 2021 sa pamamagitan ng isang cover ng kanyang iconic song na “Araw Gabi.”
Para sa mga hindi aware, si Loren ay kilala bilang orihinal na boses sa hit song na “Never Enough,” na ginamit sa pelikulang “The Greatest Showman” at ni-lipsync ng Hollywood actress na si Rebecca Ferguson.
Nananatiling lihim ang kanyang pagkakakilanlan noon hanggang sa lumabas siya sa Britain’s Got Talent noong 2022 at inamin ang kanyang papel sa likod ng iconic na kanta.
Bukod dito, siya rin ang nagbigay ng demo vocals para sa “A Million Dreams.”
Samantala, kamakailan ay naging usap-usapan din si Regine matapos niyang ipahayag sa isang panayam sa ABS-CBN News na pinaghahandaan na niya ang kanyang retirement.
Matatandaang matagumpay niyang ginanap ang kanyang “Reset” Valentine’s concert nitong Pebrero.
Disclaimer: The comments uploaded on this site do not necessarily represent or reflect the views of management and owner of Bandera. We reserve the right to exclude comments that we deem to be inconsistent with our editorial standards.