Pagkampi raw ni Vice Ganda kay Duterte viral: FAKE NEWS! Wag paniwalaan!

Vice Ganda at Rodrigo Duterte

INALMAHAN ng Phenomenal Box-office Star na si Vice Ganda ang pagkalat sa social media ng fake quote card kung saan pinupuri ang dating Pangulong Rodrigo Duterte.

Hindi pinalampas ng TV host-comedian ang pekeng socmed post at pinabulaanan ang nakasulat dito matapos mag-trending ang kanyang pangalan kaugnay ng pagkaaresto ni Duterte.

Never daw siyang nagbigay ng ganitong pahayag sa social media o sa anumang news organization kaya agad siyang humingi ng tulong sa madlang pipol na i-report ito sa mga kinauukulan.

Ang mababasa sa nasabing quote card, “Ayaw kong magpakahipokrito ha, aminin natin nung time ni FPRRD, karamihan ng adik nagbagong buhay, karamihan sa mga kriminal nag uu nahang sumuko dahil sa takot kay Duterte.

“Confident kayong lumabas sa gabi dahil alam niyong yung mga kriminal at masasamang loob nabawasan na.

“Kung hindi si Duterte ang namuno ng pandemic, lahat tayo patay. Lahat ng pondo ng gobyerno ginamit ni Duterte maitawid lang tayo sa pandemic.”

Sa pamamagitan ng kanyang X at Facebook account, naglabas ng saloobin si Vice at mariin ngang pinabulaanan na siya ang nagsabi ng nakasulat sa quote card.

“I never stated this. Pls report,” ang sabi ni Vice sa kanyang X page kalakip ang nasabing pekeng quote card.

Ni-repost din niya ito sa FB at nilagyan ng caption na, “FAKE NEWS!

“Huwag paniwalaan ang kumakalat na pahayag na ito! Wala po akong inilabas o sinabi na ganitong statement.

“Maging mapanuri at huwag basta maniwala sa impormasyong walang malinaw o opisyal na pinagmulan. Please report!” sabi pa ni Vice.

Inaresto si Duterte kahapon sa Ninoy Aquino International Airport Terminal 3 sa bisa ng arrest warrant mula sa  International Criminal Court ng mga operatiba ng PNP-CIDG.

Kagabi, dinala na nga ng mga otoridad ang dating presidente sa The Hague sa The Netherlands kung saan nito haharapin ang mga kasong kanyang kinakaharap.

Sa isang panayam kay Sen. Bong Go, sinabi nitong nakatakda sana umanong magpa-check-up at sumailalim sa isang medical procedure sa Cardinal Santos Medical Center, San Juan City.