McCoy de Leon hindi mapatay-patay ni Coco sa Batang Quiapo: Parang pusa!
McCoy de Leon at Coco Martin
DAPAT pala ay ilang linggo lang ang karakter ni McCoy De Leon sa “FPJ’s Batang Quiapo” bilang si David pero na-extend ito ng dalawang taon.
Nakitaan kasi siya ng willingness matuto ng direktor,, producer at aktor na si Coco Martin na gumaganap bilang si Tanggol sa serye.
Base sa kuwento ni Coco sa ABS-CBN , “Si David talaga, si McCoy, ang original niya, hanggang pilot lang siya. Kinausap ko na siya. Pero dahil nakita namin yung pagpupursigi, talagang gusto niya matuto, nakita namin ‘yung galing, ‘yung willingness, ayan, umabot na ng two years.”
Napansin pang nagpakita si McCoy na gustung-gusto niya ang karakter niya na at kapag natunugan nitong papatayin na si David ay saka nito hinuhusayang umarte.
Baka Bet Mo: McCoy sinuwerteng mapasama sa ‘Batang Quiapo’, tuwang-tuwa nang mapiling gumanap bilang utol ni Coco
Obvious naman kaya ayaw mawala ni McCoy sa series ay sa dahilang wala siyang regular na programa na kailangan niya para buhayin ang mag-ina niyang sina Elise Joson at anak na si Baby Felize.
“Sabi nga namin, ‘May pagka-pusa to.’ Kapag malapit na namin patayin, laging ginagalingan na nanghihinayang kami, kasi nga di ba, as in, parang sayang naman. Parang nakakatulong siya sa show eh. Ang daming mga incident na gano’n.”
View this post on Instagram
Samantala, labis naman ang pasalamat ni McCoy o David sa “BQ.”
“Bilang alam naman po natin sa generation ng mga cast sa Batang Quiapo isa ako sa pinakabata, ako mas lalo kong iniisip na sobrang suwerte ko dahil nag-uumpisa palang ako (kasama ko na sila).
“First day ng Batang Quiapo, sabi lang sa akin, ‘Huwag kang ngingiti’. Sabi ko, ‘Bakit po, Direk?’ ‘Kasi nakikita yung dating McCoy. Kailangan natin dito iba,'” tsika ni McCoy.
Dagdag pa niya, “Kaya hanggang ngayon hindi ako ngumingiti sa Batang Quiapo. Yung ngiti ko lang, pangdemonyo na ngiti. Ngisi lang.
“Kaya masarap po sa pakiramdam na ‘yung suwerte ko din. At the same time, na-discover kong pangkontrabida din pala ako.
“Actually, masaya pala na ngayon ko na naramdaman ulit, from a love team, ngayon ko naramdaman na mas effective pala ako na masama. At hindi ko magagawa yun kung hindi sa paggawa ng karakter ni David.
“Thank you so much talaga. Maraming salamat. Kuya (Coco), alam kong nahirapan ka sa akin talaga, alam ko yun. And sa mga director na nagtitiyaga rin sa akin noong una,” aniya.
At dahil effective siyang kontrabida ay marami ang pumupuri sa kanya bagay na alam din naman ng production ni Coco.
“Ako po yung talagang actor na hindi magsasalita. Kung ano lang sabihin niya sa akin, yun yung gagawin ko. Pero dito, ako na mismo yung tinatanong nila, ‘Kuya, tingin mo, ano gagawin dito?’ Minsan nabibigla ako, ‘Hala, sumasagot na pala ako sa mga pwede kong gawin.
“Ganoon kasarap maging cast ng Batang Quiapo. At kapag nagawa mo yun, ang sarap sa feeling.
“At the same time nga, yung pakiramdam pagkauwi mo galing sa ibang event, hindi na McCoy ang pangalan ko, David na. Kaya maraming salamat. Kaya di ko makalimutan ito, Batang Quiapo.”
Kaya ganito na ang tono ni McCoy ay sa dahilang mamamaalam na siya sa “FPJ’s Batang Quiapo” isa sa mga araw na ito.
Disclaimer: The comments uploaded on this site do not necessarily represent or reflect the views of management and owner of Bandera. We reserve the right to exclude comments that we deem to be inconsistent with our editorial standards.