Mister Fitness Supermodel World Philippines Michael Angelo Toledo nahanap na ang ‘Miss’ niya

Mister and Miss Fitness Supermodel Philipines Michael Angelo Toldeo at Kristel Galang/ARMIN P. ADINA

HINIRANG bilang Mister Fitness Supermodel World Philippines ang Cebuanong si Michael Angelo Toledo sa Misters of Filipinas pageant noong Oktubre ng isang taon, nakatakdang sumabak sa isang bagong pandaigdigang patimpalak. Para pala sa mga lalaki at babae ang contest na sasalihan niya.

At ngayon, natagpuan na ng “mister” ang “miss” niya nang italaga ang aktres at event host na si Kristel Galang bilang katambal ni Toledo sa unang edisyon ng Miss and Mister Fitness Supermodel World competition, na nakatakdang itanghal sa Vietnam sa Mayo.

Opisyal na ipinakilala si Galang bilang Miss Fitness Supermodel World Philippines sa “2023 Kickstart” program ng Prime Event Productions Philippines (PEPPS) Foundation Inc. sa grand ballroom ng Winford Manila Resort and Casino sa Maynila noong Peb. 28. Isa siyang homegrown talent ng foundation na nag-host na ng ilang live events at pageants, at napanood na rin sa isang digital series.

Mister and Miss Fitness Supermodel Philipines Michael Angelo Toldeo at Kristel Galang/ARMIN P. ADINA

Sabay na tinawag sina Toledo at Galang sa entablado na iparating ang balita. Muling sumampa si Galang upang samahan ang mga kapwa niya cast members ng “Forever Yours” nang itampok ang paparating na bagong digital series noong gabing iyon.

Samantala, sinamahan ni Toledo ang mga kapwa niyang reigning king ng Misters of Filipinas nang iparating ang mga dapat abangan para sa ika-10 edisyon ng pambansang patimpalak. Susunod din siya sa magandang naipakita ng kapwa niya 2022 titleholder na si Jovy Bequillo na hinirang bilang Man Hot Star International sa Thailand noong Disyembre, at ni 2019 winner Vandave Paragas na second runner-up naman sa male division ng I Am Model Search sa Malaysia nitong Enero.

Sinabi ng PEPPS na layunin ng Miss and Mister Fitness Supermodel World competition na maging isang “platform for young people who are passionate about sports and fashion,” at “expected to help promote images of Vietnamese culture and tourism to international friends.”

Nakatakdang tumulak sila Toledo at Galang sa katimugang lalawigan ng Binh Huan sa Vietnam sa Mayo 12 kung kailan inaasahang magsisipagdatingan ng mga kalahok mula sa iba’t ibang bansa. Itatanghal ang final event ng Miss and Mister Fitness Supermodel World competition sa Mayo 22.