Miss World PH queens masaya sa pagsabak ni Justine Felizarta sa Miss Tourism World pageant
Miss World Philippines-Tourism Justine Felizarta/MISS WORLD PHILIPPINES PHOTO
SUMALI si Justine Felizarta sa 2022 Miss World Philippines pageant bilang huling pagkakataon na makasungkit ng koronang magdadala sa kanya sa pandaigdigang entablado. Tinanggap niya ang titulong Miss World Philippines-Tourism, katumbas ng first runner-up, ngunit wala itong kaakibat na international assignment.
Ngunit kamakailan lamang, ibinahagi ng national pageant organization na ipadadala siya sa Miss Tourism World competition ngayong taon, isang mabilisang pagtatalaga kaya agad siyang nag-empake patungo sa Vietnam para sa katuparan ng matagal na niyang pangarap. At puspos din ng galak ang “sisters” niya sa Miss World Philippines pageant.
“We are so, so excited for Justine because we’ve been waiting for her to compete internationally. She’s a veteran in pageantry, and she deserves the role,” sinabi ni reigning Miss World Philippines Gwendolyne Fourniol sa Inquirer sa Christmas tree lighting program ng Joy-Nostalg Hotel and Suites Manila sa Pasig City noong Nob. 16.
Ganito rin ang saloobin ng kapwa runner-up ni Felizarta na si Miss World Philippines-Charity Cassandra Chan: “I am so giddy with excitement because Justine is so amazing. She’s already a veteran in pageantry, and all she needs is that international stage to show everyone what she’s got.”
View this post on Instagram
Pinaulanan pa ni Fourniol ng papuri ang 28-taong-gulang na si Felizarta. “She’s amazing, beautiful inside and out, and she has an advocacy,” aniya.
“We love her so much, and we’re so proud of her. We’re even thinking of flying to Vietnam to watch,” pagpapatuloy pa ni Fourniol.
Upang matukoy mula sa sangkaterbang “Tourism” pageants, ang sinasalihan ni Felizarta ay ang patimpalak na itinatanghal ng Miss Tourism World Organization (MTWO) na mula sa United Kingdom at tinatag noong 1991.
Dalawang Pilipina na ang nakasungkit ng korona, at kapwa sila mga runner-up sa Binibining Pilipinas pageant—sina Suzanne Park Fahling na nasungkit ang international title noong 1995, at Michelle Reyes na nagwagi noong 2002.
Sumali na rin sa Bb. Pilipinas pageant si Felizarta. Lumahok din siya sa Miss Universe Canada contest.
Sa Dis. 3 itatanghal ang coronation night ng 2022 Miss Tourism World pageant sa Vinh Yen City sa Vinh Phuc Province ng Vietnam.
Related Chika:
Tagapagmana ni Mrs. Tourism Universe Hemilyn Escudero-Tamayo kokoronahan na
8 kandidata naghati-hati sa 5 special award ng Miss World PH 2022
Disclaimer: The comments uploaded on this site do not necessarily represent or reflect the views of management and owner of Bandera. We reserve the right to exclude comments that we deem to be inconsistent with our editorial standards.