Adbokaserye nina Ken at Rita trending agad: pang-best actor at best actress agad ang aktingan

ABOT-LANGIT ang pasasalamat ng Kapuso loveteam na sina Rita Daniela at Ken Chan matapos makasama sa top trending topic sa Twitter ang pagsisimula ng teleserye nilang “Ang Dalawang Ikaw.”

Pinag-usapan at mainit na tinutukan ng Kapuso viewers ang world premiere ng bagong GMA afternoon series na pinagbibidahan nga ng tambalang RitKen kamakalawa, June 21.

Nag-ingay ang fans at social media followers nina Ken at Rita sa Twitter nang makita nilang muli on-screen ang kanilang mga idolo makalipas ang mahabang panahon.Dalawang topic patungkol sa “Ang Dalawang Ikaw” ang umangat sa trending list ng Twitter Philippines nitong Lunes.

Trending at number six ang ADINelsonxMia, na nakakuha ng mahigit 13,000 tweets, samantalang nakuha naman ng ADI WORLD PREMIERE, na may mahigit 8,000 tweets, ang ninth spot sa trending list.

Sa pagbubukas pa lang ng unang dalawang episode ng “Ang Dalawang Ikaw” ay na-hook na agad ang mga manonood sa kuwento at tema nito.

Dito, ipinakita ang pagbisita ni Mia, ginagampanan ni Rita, kay Nelson, ginagampanan ni Ken, sa isang psychiatric facility. Sa isang eksena ay biglang nagwala si Nelson na ikinatakot ni Mia.

Sa nasabing episode, ipinakita rin ang simula ng pag-iibigan nina Nelson at Mia, na nagkakilala noong sila ay nasa kolehiyo pa lang.

Humanga naman ang netizens kina Ken at Rita na simula pa lang ay pang-best actor at best actress na agad ang aktingan.

Ipinakilala rin dito si Jo, best friend ni Mia, na ginagampanan ni Lianne Valentin; at si Greg, kuya ni Mia, na ginagampanan ni Dominic Roco.

Sa pagsisimula pa lang ng kuwento ay makikita na ang pagkakaiba ng ugali ng mga karakter nina Ken at Rita na lalo pang nagpa-excite sa kwento.

Inilunsad din sa pilot episode ang posibleng triggers na mag-uudyok kay Nelson na ilabas ang kanyang pangalawang persona, na makilala na sa mga susunod pang episode ng serye.

Komento ng ilang viewers, “intense” at “nabitin” sila sa pilot episode kaya nangakong tututukan na nila ang mga susunod pang mga eksena.

Sa direksyon ni Jorron Lee Monroy, mapapanood ang balik-tambalan ng RitKen sa “Ang Dalawang Ikaw”, Lunes hanggang Biyernes, 2:30 p.m., pagkatapos ng “Eat Bulaga” sa GMA.