Resbak ni Luis sa basher ni Jessy: Napakabobo mo naman if ‘di mo gets yun, pabili ka utak sa 12.12 sale

INALMAHAN ni Luis Manzano ang tila pang-iinsulto ng ilang bashers sa girlfriend niyang si Jessy Mendiola nang dahil sa suot nitong mamahaling relo.

Kinuwestiyon kasi ng isang Instagram user ang kapasidad ng aktres sa pagbili ng luxury wristwatch.

Paano raw kaya ito nagkaroon ng ganu’ng klase ng relo na pagkamahal-mahal na mga kilala at super rich lang ang nakaka-afford.

Nag-post kasi si Jessy ng kanyang litrato sa IG na kuha sa Amanpulo kung saan sila nagbabakasyon ngayon ni Luis.

“Kissed by Mr. Sun. [shining sun emoji],” ang caption ng dalaga sa ipinost niyang photo.

Ilang netizens ang nakapansin sa suot na relo ng dalaga. May nagsabing isa raw itong Patek Philippe Nautilus watch na isa sa pinaka-expensive na relo sa buong mundo na may price tag na P1.8 million hanggang P9 million.

Ayon sa isang follower ni Jessy, “How can she afford a Patek?” Na sinagot naman ni Jessy ng, “Um… because I work hard and save a lot? Lol.”

Hindi rin ito pinalagpas ni Luis at sinagot ang netizen ng, “Work and save till you can buy and enjoy what you want in life no matter what they may be.”

“Napaka bobo mo naman if di mo gets yun. pabili ka utak ngayong 12.12 sale…work and save para ma afford mo rin ang brain,” pang-aasar pa ni Luis sa basher.

Sabi naman ng netizen kay Luis, “Bakit ka defensive? Nagtatanong lang ah?” Na sinagot uli ng TV host ng, “12.12, add to cart – brain.” Ang tinutukoy ni Luis ay ang magaganap na Christmas sale ng mga online shopping sites sa Dec. 12.

Samantala, isang Instagram follower naman ni Jessy ang nagkomento sa sinabi ni Luis, “Sampalin niyo ng taxi yan at gasoline station kuya ehehehe,” na ang tinutukoy naman ay ang taxi at gasoline business ng boyfriend ni Jessy.

Ang reply naman sa kanya ni Luis, “Basta may trip ka sa buhay, kesyo simple o hindi… pagtratrabahuhan mo yun at pagiipunan.”