Tambalang Kokoy-Elijah ng ‘Game Boys’ pahingan muna; Alex Diaz biglang umeksena

Kaya naman ang aktres na si Adrianna So muna ang bibida sa digital series na “Pearl Next Door” na napapanood na ngayon sa YouTube channel ng IdeaFirst Company.

Lumabas na ang teaser ng bagong BL series na “Oh Mando” na pagbibidahan nina Kokoy at Alex Diaz mula sa Dreamscape Entertainment na idinirek ni Eduardo Roy, Jr..

Natanong namin ang manager ng “Game Boys” na si Direk Perci Intalan kung hindi ba makakaapekto sa tambalan nina Elijah at Kokoy na ipareha sila sa iba considering na may sequel na ang series at isasa-pelikula pa ito.

‘Hey Reggee! Naku hindi naman. Iba naman ang kuwento ng Game Boys sa mga projects ni Kokoy. At saka siguro iba rin ang rules kapag ganitong parehong lalaki ang nasa love team hahaha,’ sagot sa amin ni PMI (tawag namin kay direk Perci).

Nabanggit namin na ang ganda ng feedback sa trailer ng “Oh Mando” at bagay din bilang gay partners sina Kokoy at Alex.

Ang paliwanag sa amin, “Seriously confident ako na parehong mahusay na artista sina Kokoy at Elijah so kahit anong role at kuwento, kahit sino pa ang kasama nila, alam kong kaya nilang bigyang buhay.

“At ganu’n din pag bumalik na sila bilang Gavreel at Cairo, kaya nilang buhayin uli ang mga characters na ‘yun at ang love story na ‘yun,” sabi pa sa amin.

Nabanggit din ng low profile manager cum director na sobrang sipag ng mga alaga niya dahil napagsasabay nila ang mga proyekto nila.

‘’Ha-hahaha! Iba rin ang sipag nitong sina Kokoy at Elijah,’’ sabi pa ni PMI nang maka-chat namin sa Facebook messenger.

Samantala, kahit abala si Elijah sa trabaho ay hindi nito napapabayaan ang pag-aaral niya (Philippine Arts sa UP Manila). At si Kokoy naman ay nakapagtapos na ng Culinary Arts.