Nagkalinawan na: Lumayas na assistant ni John Regala ang namahala ng donasyon pati listahan ng donors

Kaya naman pala paulit-ulit na sinasabi ni John Regala na wala siyang natatanggap na pera mula sa mga donasyon na nakalap nina Chuckie Dreyfuss, Nadia Montenegro at Aster Amoyo ay dahil hindi naman pala talaga dumaan sa kanya ang mga deposit slip at listahan ng mga taong nagbigay at kung magkano.

Sa panayam nina John at Chuckie kay Raffy tulfo kamakailan, nagkaalamanan na ang mga binabanggit ng una na wala siyang nakukuhang deposit slip at listahan ng donors ay dahil ibinigay naman pala sa assistant nitong si Teddy Imperial na lumayas na sa tabi niya.

Base sa pahayag ni Chuckie, kay Teddy nila kumpletong ibinigay lahat. Pero dahil hindi nga nakarating kay John kaya siya nagagalit.  Galit din ang naramdaman ng mga kaibigang tumulong sa kanya dahil parang lumabas sa balita na hindi nila ibinigay ng kumpleto ang mga nakalap na donasyon.

Ipinakita ang assistant ni John na si Teddy na gusto rin magsalita pero pinigilan siya dahil kailangan muna siyang imbestigahan dahil nasira na ang credibility nito.

Ayon kay Raffy, “Si Sir Teddy, ayan magsasalita pero now for me, mukhang sira na kaagad ang credibility nito because sa kanya ibinigay ‘yung mga resibo and then mukhang mayroon daw siyang sasabihin na hindi maganda.  I think, this is not the right time, we have to investigate Sir Teddy muna.

“Sorry Sir Teddy ha, kasi ang pagkasabi sa akin marami ka raw sasabihing na masasama against Mr. Regala, I’m not gonna allow that simply because tumakas ka kasi ‘yung mga resibo na supposed to be ipapakita mo kay Sir John na galing kay Mr. Chuckie na mga donasyon tinakas mo at hindi mo ibinigay for whatever reason. Ikaw lang ang nakakaalam ngayon.

“You’ll gonna say a lot of bad things about Mr. REgala, imbestigahan muna kita Sir Teddy ha, kasi tumakas ka, eh.  Meron ka dapat ipapaliwanag muna, I’m gonna take muna ‘yung mga sasabihin mo.  Pagkatapos ka naming imbestigahan at nalaman namin ang pagkatao mo, then saka namin kayo pagsasalitain.”

At dito na tinapos ng radio-TV anchor ang panayam niya kina John at Chuckie.

Iisa ang tanong ng lahat, bakit nilayasan si John ng assistant niya at ano ang pasabog nito laban sa kanya?