Joey Paras nanghingi ng tulong pinansiyal para sa heart surgery 

NANGHIHINGI ng tulong ngayon ang komedyanteng si Joey Paras para sa pagpapatuloy ng kanyang angioplasty procedure.

Ayon kay Joey, o Joseph Estrada Paras sa tunay na buhay, kailangan niya ng P750,000 para sa gagawin sa kanyang heart surgery.

Sa pamamagitan ng Instagram, nanawagan ang komedyante sa may mga mabubuting puso na tulungan siyang makalikom ng sapat na halaga.

“Friends, followers, family, loved ones. I need your HELP. Please Go Fund Me.

“Hindi pa po natutuloy ang Angioplasty procedure ko due to lack of funds,” pakiusap ni Joey na dalawang beses nang sumailalim sa heart surgery dahil sa iniindang heart condition.

Kung matatandaan, tinulungan siya noon ng mga kasamahan niya sa weekly noontime show noon ng GMA 7, ang Sunday PinaSaya, para sumailalim sa angioplasty sa ikalawang pagkakataon.  

Balitang ipinagbibili na rin ng comedian ang bahay niya sa Imus, Cavite para matustusan ang iba pa niyang pangangailangan.

Naka-confine ngayon si Joey sa St. Luke’s Medical Center sa Bonifacio Global City, Taguig, base na rin sa mga litratong ipinost niya sa IG.

Samantala, masaya naman niyang ibinalita sa kanyang mga kaibigan at social media followers na negative ang result ng isinagawang COVID-19 test sa kanya.

“I tested negative sa COVID-19 testing. Praise God!

“Para akong nanalo ng award. Now, this makes me happy.

“Edema and heart failure, tayo naman ang magtutuos,” kuwento ni Joey sa kanyang Facebook post. 

Sa mga gustong tumulong sa komedyante, maaring magbigay ng financial help sa pamamagitan ng crowdfunding website na GoGetFunding na nakalagay sa pangalan niya.