Napagkamalang baboy-ramo… mangangaso napatay ng kasama

NASAWI ang isang mangangaso nang mabaril ng kanyang kasama, matapos umanong mapagkalamang baboy-ramo, sa kasukalan ng Cabugao, Ilocos Sur, kahapon (Linggo).

Nakilala ang biktima bilang si Reynaldo Tatson, 49, ayon sa ulat ng Ilocos regional police.

Kusa namang sumuko sa mga awtoridad ang suspek na si Melchor Tatson, 28.

Naganap ang insidente sa Sitio Caset, Brgy. Maradodon, t naiulat sa pulisya dakong ala-1:45 ng hapon.

Sadyang nagtungo sina Reynaldo, Melchor, at apat pa katao sa masukal na bahagi ng sitio para maghanap ng makakaing baboy-ramo.

Lumabas sa imbestigasyon na habang nakapuwesto sa isang mataas na lugar si Melchor ay di nito napansing gumapang si Reynaldo patungo sa dawagan.

Kasunod nito’y napansin ni Melchor ang isang itim na ulo 15 metro mula sa kinatatayuan at inakalang ito’y baboy-ramo, kaya pinaputukan ng kanyang homemade 12-gauge shotgun, ayon sa ulat.

Gayunman, paglapit sa kanyang target ay bumulaga kay Mechor ang nakahandusay na si Reynaldo, at nakitaan ito ng tama ng bala sa katawan.

Matapos ito’y sumuko si Melchor sa barangay chairman ng Maradodon, na siya namang nag-ulat ng insidente sa pulisya.

Nasa kostudiya na ng pulisya si Melchor at kanyang baril, para sa posibleng pagsasampa ng kasong reckless imprudence resulting in homicide.