Eala, Indon partner kampeon sa Australian Open girls doubles

Filipino tennis player Alex Eala. Rafael Nadal Academy photo

MAGAAN na dinispatsa ni Filipina junior tennis player Alex Eala at kaparehang si Priska Nugroho ng Indonesia ang nakatunggaling sina Ziva Falkner ng Slovenia at Matilda Mutavdzic ng Great Britain sa finals, 6-1, 6-2, para magkampeon sa Australian Open girls doubles championships Biyernes sa Melbourne, Australia.

Bunga ng panalo, ang 14-anyos na si Eala ang naging unang Filipino netter na nagwagi sa Australian Open o ano mang Grand Slam event magmula noong 2009 nang magwagi sina Francis Casey Alcantara at Hsieh Chen-peng ng Chinese Taipei sa Australian Open boys doubles.

Matinding paglalaro ang muling ipinamalas ng fourth seed na sina Eala at Nugroho na nakausad finals matapos patalsikin ang No. 1 seed na sina Kamilla Bartone ng Latvia at Linda Fruvirtova ng Czech Republic (1-6, 7-5, 10-8) sa semifinals.

Kabilang din sa mga tinalo nina Eala at Nugroho sina Aubane Droguet at Selena Janicijevic ng France (7-6 (2), 6-2) sa quarterfinals; Julie Belgraver ng France at Pia Lovric ng Slovenia (6-2, 4-6, 11-9) sa second round; at Elina Avanesyan ng Russia at Liubov Kostenko ng Ukraine sa first round.

Si Eala, na scholar sa Rafael Nadal Academy, ay kasalukuyang nasa No. 9 spot sa world rankings.