PNP nagbantang babawiin ang kasunduan sa ‘Ang Probinsyano’ matapos ang rape ng scene ng lady cops

NAGBANTA ang Philippine National Police (PNP) na ikakansela ang Memorandum of Understanding (MOU) na pinirmahan sa mga opisyal ng ABS-CBN matapos ang eksena sa seryeng Ang Probinsyano kung saan ni-rape ng mga miyembro ng sindikato ang dalawang babaeng pulis.

“In light of the concern raised by netizens and police officers on ‘Ang Probinsyano’ scene where policewomen in uniform were being harassed and raped, we will talk to the production staff of ABS-CBN and look at possible violation of our existing Memorandum of Understanding,” sabi ni PNP Deputy Spokesperson Lt. Col. Kimberly Molitas.

Matatandaang pinirmahan ang MOU sa pagitan ng PNP at ABS-CBN noong Nobyembre 2018, kung saan pinayagan nito na gamitin ang mga uniporme at kagamitan ng mga pulis, bagamat kailangan ng superbisyon ng mga opisyal ng pulis.

“Depending on the extent of the violation we may warn them or rescind the said MOU,” sabi ni Molitas.

Base sa Hulyo 15 episode ng Ang Probinsiyano, makikitang ginahasa ng aktor na si Baron Geisler na kilala sa karakter na Bungo na ginagahasa ang isa sa mga babaeng pulis.

Binatikos ng mga netizens ang eksena, sa pagsasabing dapat maging sensitibo ang production team sa isyu ng rape, samantalang tinawag naman ito ng iba na kawalan ng respeto sa mga unipormadong opisyal.