Pokwang bibigyang-pugay ang mga bagong bayani sa MMK

MAGBABALIK-TELEBISYON si Pokwang matapos ang kanyang pagbubuntis sa espesyal na Mother’s Day episode ng Maalaala Mo Kaya ngayong Sabado ng gabi.

Tunghayan ang kwento ng inang si Azon na nagtatrabaho sa Italy. Para sa kanyang pamilya, gagawin niya ang lahat para lang matustusan ang kanilang pangangailangan.

Walang kamalay-malay ang kanyang mga anak na sina Tet (Empress) at Tot (Dino Imperial) sa hirap na kanyang dinadanas hanggang sa pumunta sila sa Italy at personal na nasaksihan ang kalagayan niya roon.

Masakit man ay ginamit ni Tet ang nasaksihan bilang motivation para magsikap at maiahon ang ina sa ganoong kalagayan.

Ngunit, isang dagok ang kakaharaping ng pamilya nang ma-stroke ang amang si Augusto (Jeric Raval) kaya naman napauwi si Azon ng wala sa oras para alagaan ang asawa.

Paano kaya nila hinarap ang pagsubok na ito? Ano ang gagawin ni Tet para makatulong sa pamilya?

Makakasama rin sa upcoming episode sina David Chua, Kim Molina, Hyubs Azarcon at Dang Cruz.

Ito’y sa direksyon ni Dado Lumibao at sa panulat ni Mary Rose Colindres. Ang MMK ay pinamumunuan ng business unit head na si Roda dela Cerna.

Abangan ang longest-running drama anthology sa Asya, ang MMK tuwing Sabado ng gabi sa ABS-CBN.