‘Nakakatakot ang mga susunod na araw para kay Baron Geisler!’

ISANG araw, kapag hindi pa rin tumitigil si Baron Geisler sa pagiging makulit at pagiging basagulero, ay makakahanap din siya ng katapat na papatol sa kanya.

May kakapusin din ng pasensiya isang araw sa aktor, at kapag nangyari ‘yun, sa umpisa pa lang ay siguradong sunog na sunog na sa paghusga ng buong bayan ang aktor na ito.

Kahit pa sabihing ang nakaaway niya ang may kasalanan, sabihin pang ito ang nagpasimuno sa gulo ay siguradong si Baron ang sisisihin ng husgado ng bayan.

Wasak na wasak na kasi ang kanyang imahe dahil sa kanyang kabarumbaduhan, wala na siyang sinisino, pati nga si Pangulong Rodrigo Duterte ay hinahamon na niya ng drug test.

Sino pa ang maaasahan nating irespeto ng basa-gulerong aktor na ito kung pati ang pinakamataas na pinuno ng ating bayan ay hindi niya binibigyan ng paggalang?

Nakakatakot ang mga susunod na araw para kay Baron kapag hindi pa rin niya tinantanan ang pagpapapansin sa pamamagitan ng kanyang mga kalokohan. Magkakaroon ng tuldok ang kanyang mga pinaggagagawa.

Makakatagpo siya ng taong kapos sa pasensiya, kaya papatulan siya at uupakan, du’n pa lang hihingi ng saklolo ang bagamundong si Baron Geisler.

Habang maaga pa ay mag-isip-isip na sana ang taong ito. Magbago na siya, gamutin na niya ang kanyang sarili sa mga binibitbit niyang galit sa mundo, ‘yun lang ang tanging sagot sa mga kalokohang pinaggagagawa niya ngayon.