Alden, Maine bumandera sa isang dyaryo sa Italy; ‘Imagine You & Me’ ang working title ng pelikula

MAINE MENDOZA AT ALDEN RICHARDS

MULING pinatunayan nina Alden Richards at Maine Mendoza na hindi lang sila dito sa Pilipinas sikat kundi pati na rin sa ilang bahagi ng mundo, kabilang na nga riyan ang Europe.

Nabatid na bumandera rin ang loveteam nina Alden at Maine sa isang pahayagan sa Italy kung saan sila nagsu-shooting ngayon para sa kanilang solo launching movie under APT Entertainment.

Kumalat kahapon sa social media ang screen shot ng isang news item mula sa pahayagang La Provinciana na ipinost ng isang fan club ni Alden sa Instagram, ang Aldenatics Zambales. Ayon sa nasabing artikulo, ang working title raw ng AlDub movie ay “Imagine You And Me.”

Ang nasabing screen grab photo mula sa fans ni Alden ay may caption na: “Ang mag better half…in the news sa Como, Italy. Nakakaproud talaga kayo @aldenrichards02 @mainedcm! Love the fact that the names mentioned in the Italian news are RICHARD FAULKERSON, JR. and MAINE MENDOZA. Real na real! #ALDUBinITALYDay2!”

Nakasulat din sa nasabing news item na ang ilan sa mga eksena nina Maine at Alden ay kinunan sa Piazza Cavour. Magtutungo rin daw ang magka-loveteam, sa Lake Como kung saan kukunan ang iba pang kilig scenes ng dalawa. Hanggang katapusan na raw ng buwan mananatili roon ang buong production ng pelikula.

Ang nasabing movie ay under the direction of Mike Tuviera, bukod dito wala pang ibang detalyeng inilalabas ang producer tungkol sa first solo movie ng AlDub.

Samantala, kahit na nasa Italy sina Maine at Alden, humahanap pa rin sila ng oras para makapagbigay ng mga update sa kalyeserye ng Eat Bulaga tungkol sa mga ginagawa nila sa Italy.

Ayon sa dalawa, miss na miss na raw nila ang mga dabarkads kasabay ng pakiusap sa AlDub Nation na patuloy na suportahan ang EB at maghintay lang sa kanilang pagbabalik.