Sheryl Cruz binuhay ang bangkay; ’BINUGBOG’ ng mga kakampi ni Grace

Negang-nega ang imahe ngayon ni Sheryl Cruz, natupad ang kanyang pa-ngarap na bumida siya sa mga pahayagan, radyo at telebisyon, ang nakalulungkot lang ay sa anong paraan?

Nabubuhay ngayon si Sheryl sa pamba-bash ng ating mga kababayan, gusto man o hindi si Senadora Grace Poe, maraming naiinis kay Sheryl dahil sa mga ginagawa niyang pangmamaliit sa kapasidad ng senadorang tatakbo sa panguluhan sa 2016.

“Kailan pa siya naging political analyst? And what does she know about politics? Ano ba ang ipinagmamalaki ni Sheryl at ganyan na lang ang ginagawa niyang paninira kay Senator Grace?

“Saka bakit ipinapasok niya ngayon sa usapan ang mommy niya na matagal na raw na nananahimik sa Amerika, sino ba ang kumakaladkad sa pangalan ng mommy niya, di ba’t siya lang naman?

“Hindi raw sila magkapatid ni Senadora Grace, magkaiba raw ang mga magulang nila, sabi ni Sheryl. E, teka lang muna, sino ba kasi ang nagpipilit magsabing magkapatid sila, meron ba?

“Ibalik ba ang nakaraan, buhayin ba ang bangkay para lang siya mapag-usapan? Gusto rin ba naman kasi siyang maging kapatid ni Senator Poe?

“Huwag naman sana, dahil kapag totoo ang iniisip ng iba, e, magiging katapusan na ‘yun ni Sheryl! Huwag sanang totoo ang haka-haka ng iba na nagpapagamit siya sa mga kalaban sa posisyon ni Senator Grace!” napapailing na sabi ng aming source.