SINIGURO ng Kapuso TV host-actor na si Alden Richards na wala silang away ni Aljur Abrenica tulad ng napapabalita.
Siya kasi ang sinisisi ng ilang supporters ni Aljur kung kaya raw umalis ang hunk actor sa GMA 7 na humantong pa sa demandahan.
Pero ayon kay Alden, natitiyak niyang hindi siya ang dahilan ng kontrobersiyang kinasasangkutan ni Aljur sa Siyete. Sa pocket presscon ng reality talent search na Bet Ng Bayan kung saan nagsisilbing co-host si Alden ng Asia’s Songbird na si Regine Velasquez, natanong ang binata kung ano ang reaksiyon niya sa balitang malapit nang bumalik si Aljur sa GMA.
“Good for him. Kasi si Aljur before, when he decided to…hindi naman to go against GMA, but kumalas sa GMA, siguro he was just confused. and ‘yung judgment na ‘yon, very scattered, hindi niya alam kung (anong gagawin).
“Pero now, it’s about time na…at nakakatuwa, kasi sino ba naman ang babalikan mo kung hindi ‘yung magulang na nagpalaki sa ‘yo? And I believe GMA would accept him with open arms,” aniya.
Hirit pa nito sa mga isyu sa kanila ni Aljur, “There’s no rivalry between us. We’re good friends. We’ve done an episode of Magpakailanman, tapos ‘yun nga, we were shooting noon sa movie sana namin na ‘Cain At Abel.’”
“Bago matapos ‘yung Cain at Abel, du’n nag-start ‘yung issue. Tapos after that, medyo nawalan ako ng komunikasyon sa kanya, so I’m just seeing him sa news. Pero now, it’s about time, and now happy ako for him na babalik siya ng GMA po.
“When we see each other, ganun pa rin. Although I respect him in a way, ayoko nang i-bring up yung isyu, baka it’s too personal to talk about. Sabi ko lang, ‘Kamusta na?’ Something like that.”
“Tsaka wala naman po siyang nagawa sa akin, wala din naman po akong nagawa sa kanya,” aniya pa. Samantala, nahahasa na si Alden bilang host sa Bet Ng Bayan, marami ang pumupuri sa kanya sa nasabing talent search, at kahit nga ang Songbird ay proud na proud sa kanya.
Ayon sa binata, ang peg niya raw sa hosting ay ang host ng American Idol na si Ryan Seacrest. “Very alive, very jolly when he speaks to the contestants.
Kumbaga, you can see there is something personal between him and the contestants. Kilala niya personal, so ako gusto ko ganu’n din ‘yung makita sa amin ng viewers,” sey pa ni Alden.
Sa darating na Dec. 28 na ang grand finals ng Bet Ng Bayan, kaya natanong ang binata kung ano na ang susunod niyang serye after Ilustrado, tugon ng binata, pinag-uusapan pa lang daw, “Pero meron din pong nag-o-offer ng movie production houses.
Medyo marami po sila, nagmi-meeting na lang po ‘yung management.”
Disclaimer: The comments uploaded on this site do not necessarily represent or reflect the views of management and owner of Bandera. We reserve the right to exclude comments that we deem to be inconsistent with our editorial standards.