Dennis mas lalong naging yummy sa mga beki

MAIINIT na eksena ang matutunghayan ngayong Linggo sa pagtatapos ng kauna-unahang medical drama series sa bansa – ang Sa Puso ni Dok.

Pinangungunahan ni GMA Drama King Dennis Trillo kasama ang award-winning actress na si Bela Padilla, tampok sa weekly series ang masaklap na realidad sa estado ng pampublikong kalusugan sa bansa.

Tinutukan ng marami ang umusbong na relasyon sa pagitan ng head resident doctor ng Melchora Aquino General Hospital na si Doc Dennis (Dennis) at ng baguhang doktor na si Doc Gab (Bela).

Maraming pinagdaanan ang mga bidang doktor at sa pagharap nila sa mga krisis sa ospital, unti-unting naging malapit sa isa’t isa sina Doc Dennis at Doc Gab.

Pero parehong may balakid sa kanilang pag-iibigan dahil may kani-kaniyang nagmamahal na sa kanila. Hinaharap din ng dalawa ang malaking problema ng korapsyon sa ospital.

Sa huling gabi ng Sa Puso ni Dok, alamin din kung may happy ending ang kanilang love story. Susugod ang ina ni Doc Dennis nang malamang natutupok ng apoy ang Melchora Aquino General Hospital.

Hahanapin ni Aling Gloria ang anak pero magiging mitsa ito ng panganib sa kanilang mag-ina. Sa pangyayaring ito, isang malaking desisyon ang kailangang gawin ni Doc Dennis na magiging dahilan ng kanilang tampuhan.

Ito na ba ang katapusan ng kanilang namuong pagtitinginan? May pag-asa pa kayang masolusyunan ang mga problema sa ospital? At matapos ang mga naranasan ni Doc Gab at Doc Dennis sa ospital, sino kaya sa kanila ang mananatili para magsilbi sa mahihirap? Sino ang mangingibang-bansa?

Sa direksyon ni Adolf Alix, Jr., tampok rin dito sina Anita Linda, Menggie Cobarrubias, Maey Bautista, AJ Dee, Gigi Locsin, Stephanie Sol, Elijah Alejo, Flor Salanga, at Sunshine Teodoro.

Huwag palampasin ang mga kaabang-abang na eksena sa huling yugto ng Sa Puso ni Dok, ngayong gabi, 9:30 p.m. pagkatapos ng Kapuso Mo, Jessica Soho sa GMA.

Anyway, mas lalong naging yummy si Dennis sa mga beki at matrona matapos niyang ibandera ang hubad na katawan sa isang underwear show.

Ayon sa mga netizens, kung meron mang isang tunay na lalaki na nag-shine bright like a diamond sa said fashion show at nagpaligaya sa mga bading, ‘yan ay walang iba kundi si Dennis! ‘Yun na!