2025 Prediction: Kamatayan sa showbiz, banta ng kalikasan, bagong pandemya

Photos from Rudy Baldwin YouTube Channel

“BIBLICAL awakening” kung ilarawan ng kilalang psychic at visionary sa Pilipinas na si Rudy Baldwin ang taong 2025.

Ibig sabihin, ang mga pangyayaring nakasaad sa Bibliya at sa kasaysayan ay mauulit daw sa 2025, kabilang na riyan ang mga sakuna, himala at mga sakit na maikukumpara sa mga naganap noong sinaunang panahon.

Sa pamamagitan ng kanyang YouTube channel, inisa-isa ni Rudy Baldwin ang mga prediksyon tungkol sa mga mangyayari ngayong taon. In-upload ito ng kilalang psychic noon pang October 13, 2024.

May titulong “2025 PREDICTION, inisa-isa nga ni Rudy ang maaaring mangyari ngayong taon kung saan patutunayan daw ng Panginoong Diyos na siya ang  pinakamakapangyarihan sa lahat – ito raw ang taon kung saan gigisingin ni Lord ang sangkatauhan.

Baka Bet Mo: Rudy Baldwin may ‘matinding’ babala para sa taong 2027, ano kaya ito?

“Ito yung taon kung saan ang Diyos mismo ang kakatok sa harapan mo, para sabihin sa ’yo na kahit gaano ka pa kayaman o kahirap, may pera ka man pagdating sa kanya pag nawala ka sa mundo wala kang dadalhin na kahit ano,” ang pahayag ni Rudy

Sa mundo ng showbiz, babaha na naman daw ng luha dahil maraming personalidad ang mamamaalam, kabilang na ang isang direktor.

“Sikat pa naman ito na showbiz, mayroong isang aksidente sa himpapawid na napasama sila sa loob mga kilalang personalidad po ito,” ani Rudy.

Base sa pangitain niya, walang kinalaman sa engine problem ang magaganap na aksidente kundi sa klima.

“Alam mo minsan yung aksidente sa himpapawid yung daraan yung eroplano mo tapos may mahabang guhit ng kidlat ibig sabihin nung pagkidlat niya kaya niyang hatiin yung eroplano,” aniya pa.

Bukod dito, may isang youngstar at veteran actor ang magtatangkang tapusin ang kanilang buhay ngayong 2025.

“Para maiwasan ang depresyon at stress kailangan maging open tayo sa pamilya natin. Communication ang kailangan. Huwag sarilinin ang problema. Magsimba po kayo,” ang payo ni Rudy

Pinag-iingat din ni Rudy ang lahat sa mga banta ng kalikasan tulad ng kidlat ngayong 2025 dahil ibang klase raw ang pinsalang dulot nito.

Kapag tumama sa lupa, magdadala raw ito ng apoy na parang mahabang lubid. Posibleng mangyari raw ito sa China at para itong mahabang lubid na kapag ipinalo, mag-iiwan ng mahabang marka.

Dagdag pa niya, ang sinumang tamaan ng powerful kidlat na ito ay hindi na umano mabubuhay kaya ang payo ni Rudy, kailangang lahat ng patay na dahon ay alisin.

Binalaan din ni Rudy ang lahat sa mga mapaminsalang tornado na walang pinipiling panahon kaya naman ang magiging tanong ng lahat, “Ito ba va ang katapusan ng mundo?”

“Kung ano ang nakikita n’yo sa pelikula na tornado at kidlat ay mangyayari na sa personal, mag-ingat po tayo,” aniya.

Bukod dito, nabanggit din ni Rudy ang tungkol sa “The Big One” na malapit na umanong mangyari. Mapapadalas na raw ang mga lindol sa iba’t ibang panig ng mundo, “Para siyang umiikot-ikot na pagyanig.”

Suggestion ni Rudy, maglagay ng wind chimes sa bahay para mas madaling malaman kung may lindol, “Kapag tumunog ang wind chimes or lata na sinabit ay magigising kayo at malalaman na may lindol.”

“Meron akong nakita talaga na may kalsada na mabiyak talaga, not just in Luzon meron din sa Pangasinan meron din sa iba,” sey pa ng psychic.

May major eruption din daw na mangyayari sa Taal ngayong 2025 na dapat paghandaan ng lahat. After ng pagsabog nito, may bagong isla na sisibol na puwedeng lagyan lamang ng imahen ng santo.

“Isla siya na nilagay ng Diyos para maglagay kayo ng santo. Pagsibol ng isla ay pansinin n’yong mabuti, tama lang yung butas doon para ang tao ay makaakyat para magdasal, may kokorte doon na lalagyan ng santo,” saad ni Rudy kasabay ng pagsasabing mas maganda raw na ilagay si San Roque.

Kailangan din daw paghandaan ang mga bagong bagyo na papasok sa bansa tulad ng paggawa ng mga bangka dahil makakatulong daw ito sa lahat. Partikular din niyang tinukoy na may asong magiging bayani dahil sa pagliligtas niya sa mag-inang na-trap sa baha.

Ang mga bagyo raw na nag-uumpisa sa letrang O, S, at P ay magiging kasingtindi  ng bagyong Ondoy,  “Malakas talaga ito. Nakakatakot ang bagyong ito. Ang daming namatay dito lalo na ang mga taga-Tacloban mag-ingat kayo diyan kasi mauulit talaga iyon lalo na sa lugar ng Baguio.”

May nakita rin si Rudy na mga magaganap na himala at kababalaghan sa kalangitan, “Minsan ang langit ay maging kulay apoy. Maulan man o hindi ‘pag kumulimlim ang kalangitan warning iyan na may aksidenteng mangyayari sa buong Plipinas o buong mundo.”

May bagong pandemya rin daw na magaganap sa 2025 dahil sa isang bacteria na magmumula sa ibang bansa.

“Ang bacteria na ito galing sa hangin ito. Once na malanghap iyon, ang paborito pa naman nitong pasukan ay ang ilong at mata.

“Once na makapasok ito sa katawan mo hindi mo maramdaman kasi ang lakas mo, magugulat ka na lang na may tumubong butlig na kasing laki ng piso at pag pumutok yung dugo niya ay kulay itim,” aniya.

May butlig din daw na tutubo sa loob ng katawan ng tao, at kapag ito raw ay umabot sa pito o walo, maaaring maging banta na ito sa kanyang buhay.

Pero hindi raw ito nakakahawa kahit na dumikit pa sa ibang tao, pero nakamamatay.

Sa huling bahagi ng video ni Rudy, hinikayat niya ang lahat na magbasa ng Bibliya at huwag titigil sa pagdarasal.