Wish ni Bistek kay Kris: Sana magkaayos na rin sila nina Kuya Ipe at Tsong Joey!

TUWANG-TUWA ang mga miyembro ng entertainment media na ipinanganak ng January hanggang September sa blow out ni Quezon City Mayor Herbert Bautista nu’ng Sabado ng tanghali sa Vera-Perez Garden,  Valencia, Quezon City.

Nasa mood si Bistek kaya hindi na siya tinantanan ng tanong tungkol kay Kris Aquino matapos siyang mag-guest kamakailan sa Aquino & Abunda Tonight kung saan pasimple siyang hiniritan ng TV host-actress na hindi nga siya marunong manakit nang pisikal,  kungdi damdamin lang.

Nag-guest si Bistek sa A&A para ipaliwanag ang tungkol sa pananampal niya sa nahuling drug pusher kamakailan. Ayon sa alkalde hindi raw talaga schedule ang guesting na yun.

Nagkataon lang dahil nag-taping siya para sa Tapatan ni Tunying. “Yung issue nga is sampalan. From there, kinausap ako nina direk Arnel (Natividad ng ABS-CBN) at saka ng mga producer.

“Ayoko nga dahil baka humaba na naman ‘yung kwentuhan, you know, but I said yes because I know ‘yung market ng A & A is different from Tunying, different from DZMM, DZBB or what have you.

Magkakaibang market ‘yun, so I have to explain kung bakit ko ginawa ‘yun sa drug pusher,” kuwento ni HB.  Dagdag pa, “Wala namang problema sa aming dalawa, even if you watch the entire segment, it was purely professional.

Okay naman siya, eh.”  Ano masasabi ni Bistek sa mga hirit ng Queen of All Media? “Typical Kris Aquino ‘yun, eh. At saka ano ‘yun, eh punchliner talaga ng babae ‘yun, eh. Parang give and take (na batuhan).

Parang si Pugo at si Patsy. Ako si Pugo, siya si Patsy,” napangiting sabi ni Bistek. Wala naman daw ilangan sa one-on-one interview nila ni Kris pagkatapos ng lahat sa kanila, “Hindi naman.

Natural kasi na mangyayari ‘yun,” kaswal na sabi ni Bistek.  Sa A&A lang kasi ulit nagkaharap sina Herbert at Kris pagkatapos ng mga nangyari kaya mabuti naman at naging light ang paghaharap na ‘yun, “Eh magaan lang naman talaga ang buhay, eh, di ba? Siguro, baka marami na siyang. . .ayoko nang magsalita.

“Marami na siyang ginagawa, baka marami na siyang plano, maraming nanliligaw siguro. So, andiyan si Derek (Ramsay) di ba?” Hiyawan ang entertainment press nang banggitin ni Herbert ang pangalan ni Derek.

Samantala, walang lovelife raw si Mayor Herbert ngayon, “Lovelife, wala. Mga bata pa rin. My daughter is in Ateneo. ‘Yung anak kong isa, mage-entrance exam sa UPCAT at sa Ateneo.

So, sana pumasa siya, ‘yun ang focus ko ngayon,” say niya sa amin. Samantala, inamin ni HB na naging eye opener na rin sa mga anak niya ang nangyari sa kanila ni Kris, “And I pray that they become stronger because of that experience and I think they are stronger (now),” saad pa ng actor-politician.

Sa tingin niya ay ano ang natutunan niya sa nangyari sa kanila ni Kris? “That no matter what, maliit lang ang mundo, eh. Maliit lang ang mundong ginagalawan natin.

She belongs to a political family, I am in public service. Magbabarkada namin kaming lahat. I mean, nagkikita-kita kami, maliit lang ang mundo.

“If you go to the other side of the world, it’s the entertainment industry, maliit din ang mundo. And our children are growing up, they could be friends, they could be co-workers in the future. So, wala namang problema,” esplika ni Bistek.

Wala raw masamang tinapay sa kanya at ganu’n din daw ang tingin niya kay Kris, “I think, that’s one of the reasons also kung bakit niya naging kaibigan ulit si James Yap. I’m looking forward na magkausap-usap na rin sila niya Kuya Ipe (Phillip Salvador, ama ng panganay ng anak ni Kris na si Joshua), nina Mayor Joey (Marquez, dating karelasyon ni Kris) so that you know, everything’s really okay.

“May nabasa nga ako na ‘huwag kang manatiling galit dahil ang masasaktan lang doon ay hindi naman ‘yung taong ikinagagalit mo kungdi ikaw mismo.’ So, parang ganu’n lang din siguro ‘yun.”

At ipinagdiinan ulit na,  “I’ve always been single. I’m not committed to anyone. I’m committed to my kids, to my work, ‘yun.”
Ang importante sa kanya ay magkaibigan sila ng mga ina ng mga anak niya, “I am seeking their forgiveness if I’ve done something wrong to one of them but I thank them so much for rearing good children, God-fearing, respectful children.”

( bandera.ph file photo )