Gloria Diaz, Jodi Sta. Maria ‘nabudol’ ni Direk Derick Cabrido, anyare!?

Gloria Diaz, Derick Cabrido at Jodi Sta. Maria

SADISTA nga ba ang direktor na si Derick Cabrido? Naitanong namin ito dahil sinasabi niya kina Ms. Gloria Diaz at Jodi Sta. Maria na may dobol sila sa mahihirap na eksenang gagawin pero ang totoo ay wala pala.

Naikuwento ito ng dalawang aktres sa grand mediacon ng pelikulang “Untold” ni Direk Derick na pinagtulungang sulatin nina Enrico C. Santos at Noreen Capili with Ms. Roselle Monteverde, produced by Atty. Keith Monteverde for Regal Entertainment.

Nakatrabaho na ng direktor si Ms. Gloria sa “Mallari” noong 2023 na gumanap na manananggal at si Jodi naman sa “Clarita” noong 2018 under Black Sheep Productions.

Unang nagkuwento ang 1969 Miss Universe ng experience niya kay Direk Derick na feeling niya ay nabudol siya dahil ang inalok sa kanya ay Barbie doll na manananggal.

“Because they texted me, eh (sabay turo sa direktor), I always said na when am I gonna stop making movies? Siguro when I’m already a mangkukulam or manananggal.

“I was little afraid when I’m doing (nakabitin-sabay muwestra), at my age parang bibitin-bitin pa ako, and Direk told me at that time, ‘no don’t worry mayroon kang double, I never saw the double, ako ‘yun!” pambubuking ng batikang aktres sa experience niya.

Nagkatawanan ang lahat lalo na sina Direk Derick at Jodi.

“Budol?” sambit ni Jodi.

Dagdag ni Ms. Gloria, “Bolero!”

“Malay ko ba, pagtingin ko (eksena) ay hindi ito kaya ng double, sige isalang n’yo siya (Ms. Gloria). Ha-hahahaha!” tawa nang tawang katwiran ni Direk Derick.

 

View this post on Instagram

 

A post shared by Jodi Sta.Maria (@jodistamaria)

Sabay sabi ni Jodi, “Tita ginawa rin niya sa akin ‘yan! Sabi niya (direktor), ‘wag kang mag-alala may double ka, tapos ako na (pala) ‘yung nakabitin.”

Hirit ni Cabrido, “Wala naman silang choice, eh.”

Biro ni Eric John Salut na nagsilbing moderator sa mediacon, “Akala ko pa naman mabait ka!”

At sa “Untold” ay inakala ulit ni Jodi na may dodobol sa kanya sa eksenang nakalubog siya sa ilalim ng lupa pero wala ulit.

Kuwento ng direktor sa amin, “Hindi ko siya (Jodi) puwedeng lagyan ng double kasi nakikita ‘yung mukha niya, so paano dadayain? Kaya talagang pinatalon ko siya (6 feet under the ground), e, may claustrophobia (fear of enclosed spaces) pala siya pero ginawa niya.

“Bago nga siya tumalon may nakikita siyang gumagapang na palaka at bulati, siyempre ilalim ng lupa, eh. Sabi niya (Jodi) ‘direk patanggal naman.’ Pinalinis ko, pero meron pa rin,” kuwento ng direktor.

Tinanong namin kung sadyang lupa iyon o nilagyan ng sapin na hindi halata, “Ay wala, lupa talaga na bagong hukay, walang daya ‘yun!” diin ni Direk Derick.

Say naman ni Jodi, “I full trust him as my director and what I liked about (him) was, he is very collaborative, open siya to suggestions na manggagaling sa actors niya.

“And I like he’s being honest na kapag may gusto siyang gawin na hindi siya magdadalawang isip na ‘let’s try it this way or that way.’ And since I trust him, sige let’s do it, so, I think ‘yun ang relationship na mayroon kami,” aniya pa.

Nang gawin daw ni Jodi ang “Clarita” ay nagsabi siya na ayaw na niyang gumawa ng horror films kasi napahirap, pero pagkalipas ng ilang taon, “Heto dumarating na naman ang Derick Cabrido at may ipi-pitch daw, wala siyang ibang ipi-pitch hindi ito drama for sure horror ito. Sabi ko, sige papakinggan ko.

“And then pinitch niya ang Untold, sabi ko na lang, sige Direk pag-usapan natin pero hindi pa ako agad nag-yes tapos nu’ng binasa kong maigi ‘yung script nagustuhan ko kasi kakaiba at ‘yung working relationship kasi namin ni Direk is built on trust na.”

Kaya naman lahat ng nasa mediacon na ginanap sa Valencia Events Place ay curious kung ano ang kuwento ng “Untold” na mapapanood na sa April 30 at R-13 without cut ang ibinigay na rating ng MTRCB.

Samantala, bukod kina Jodi at Ms. Gloria ay kasama rin sa pelikula sina Joem Bascon, Sarah Edwards, Lianne Valentin, at Juan Karlos (JK Labajo).