JK nag-alay ng kanta sa fan na namatay sa sunog, bumisita rin sa burol
JK Labajo bumisita sa lamay ng yumaong fan
ISANG madamdaming pagkilala ang ibinandera ng singer-songwriter na si JK Labajo para sa isang tagahanga.
Ito ay si Trisha Macalacay, isang graduating student ng Laguna State Polytechnic University (LSPU) na pumanaw sa isang trahedya noong March 13.
Sa isang Facebook post ng pamilya, makikita ang pasasalamat nila kay JK matapos itong personal na dumalaw sa burol ng dalaga.
“Thank you for making Trisha’s dream come true, Juan Karlos. Such a humble gentleman! Nakakahanga ka tunay, JK!” caption sa nasabing post.
Kapansin-pansin din ang shinare na video clip kung saan makikita si JK sa kanyang concert sa Laguna Sports Complex na naghandog ng kanta para sa yumaong fan.
Baka Bet Mo: JK Labajo hihingan ng public apology sa ‘pagmumura’ sa Dinagyang Festival
Ang mga inawit ng binata ay ang mga paborito ni Trisha na “Through the Years” at “Buwan.”
Pero bago kumanta si JK ay nagbigay muna siya ng mensahe:
“Sh*t, man! A tragedy happened a few days ago. I think in a school somewhere and, unfortunately, someone named Trisha passed away.
“Sabi nung family niya, Trisha was a fan of some of the songs that I made, ‘tapos there’s this particular song na sobrang gustung-gusto niya. Yun yung cover ko ng ‘Through The Years’ na ipinakita sa ‘Lolo and The Kid’ sa Netflix.
“Trisha wanted to go here tonight, kaso lang, you know…so Trisha, kung nasaan ka man ngayon, para sa iyo ito.”
Sa kabila ng matinding lungkot, nagbigay ng kaunting kapanatagan ang pamilya ni Trisha dahil sa ginawang pagbibigay-pugay ni JK.
“Watching her dream become a reality gave us a sense of hope and peace. Thank you for bringing so much comfort to our family and mostly to Trisha!” saad ng nag-post na si Elaine de Ramos.
Nagpasalamat din sila sa mga sumuporta at tumulong upang makarating kay JK ang hiling nilang mapansin ang kwento ni Trisha.
“Alam namin suntok sa buwan ‘to, pero naging posible dahil sa inyo. Sobra saya ni Trisha for sure. Sobra saya natin,” wika pa sa FB.
Ayon sa mga ulat na aming nabasa, si Trisha ay isang B.S. Biology graduating student na tumatakbo pa bilang cum laude.
Siya ay natagpuang patay sa comfort room ng ikalawang palapag ng isang gusali sa LSPU Sta. Cruz campus matapos ang sunog.
Disclaimer: The comments uploaded on this site do not necessarily represent or reflect the views of management and owner of Bandera. We reserve the right to exclude comments that we deem to be inconsistent with our editorial standards.