Ryan Bang muntik raw hiwalayan ni Paola dahil kay Ogie Alcasid, anyare?

INAMIN ng “It’s Showtime” host at negosyanteng si Ryan Bang na muntik na silang maghiwalay ng kamyang non-showbiz fiancee na si Paola Huyong.

Sa kanyang panayam kay Gladys Reyes na mapapanood sa YouTube channel ng huli ay napag-usapan nila ang kanyang buhay pati na rin ang kanyang naging showbiz career.

Dito ay natanong ni Gladys ang isa sa mga ka-close ni Ryan sa industriya na si Ogie Alcasid.

Kasunod nito ang naging pasabog ng binata tungkol sa kanyang “It’s Showtime” co-host.

Baka Bet Mo: Ryan Bang na-shock sa inamin ni Paola Huyong nang mag-samgyupsal date

“Isa siya sa pinaka ka-close ko ngayon. Tsaka first time na nag-selos si Paola dahil kay Kuya Ogie,” pagbabahagi ni Ryan.

Tila nagulat naman si Gladys at tinanong siya kung ano ang kwento sa likod ng pagseselos ni Paola.

“Bukambibig ko raw si Kuya Ogie. Usually diba, nagse-selos yung mga babae sa babae? Siya, nag-selos siya kay Kuya Ogie kasi sabi ko, ‘Alam mo, si Kuya Ogie, pag-swing niya napaka-séxy.’ Magkasama kami lagi sa golf. So sobrang galing ni Kuya Ogie mag-golf kaya naging idol ko siya,” kuwento ni Ryan.

Dagdag pa niya, si Ogie daw ang inspirasyon niya sa pagkahilig sa golf.

“First time ako nag-champion sa Golf Tournament sa ABS-CBN Golf Tournament eh dahil kay Kuya Ogie,” chika ni Ryan.

Bilib na bilib rin daw siya sa singer-songwriter sa galing nitong maglaro.

“In love na in love ako kasi ang galing niya mag-golf! Muntik na kami mag-hiwalay ni Paola dahil kay Kuya Ogie Alcasid,” sey ni Ryan.

“Nako ah, sa mga di nakakaalam, imagine mo, hindi ibang babae ang pinagawayan nila,” manghang sabi naman ni Gladys.