Babaeng piloto patay sa pagbagsak ng helicopter sa Nueva Ecija

PATAY ang 25-anyos na babaeng piloto nang bumagsak ang isang helicopter sa Guimba, Nueva Ecija, kahapon, February 1.

Natagpuan ang labi ng female pilot na na si Julia Flori Po, sa Sitio Arimung-mong, Barangay San Miguel, Guimba, Nueva Ecija, dakong alas-5 ng hapon.

Umalis sa Baguio ang chopper bandang 11:51 ng umaga at lumapag sa Binalonan, Pangasinan bandang 12:05 ng tanghali para mag-refuel.

Ngunit ayon sa report, hindi agad umandar ang helicopter matapos ang pagpapa-refuel. Nakalipad ulit ang helicopter bandang 4:30 ng hapon.

Sa panayam kay Civil Aviation Authority of the Philippines (CAAP) spokesperson Eric Apolonio, ng Super Radyo, kinumpirma ng Philippine National Police (PNP) Guimba Police Station ang pagbagsak ng helicopter.

Baka Bet Mo: Vice Ganda sumakay sa helicopter para di ma-late sa trabaho

Isa lang daw ang sakay nito, at ito nga ang lady pilot na hindi naka-survive. Aniya, “Na-retrieve immediately. Tinulungan ng mga kababayan natin doon. Sa kasamaang palad, hindi siya nag-survive.”

“May service record lahat ng aircraft na registered sa Pilipinas. May mga safety check ‘yan kaya isa yan sa pagtutuunan ng pansin, kung ano yung last record ng isang helicopter,” sabi naman ni Apolonio sa interview ng Teleradyo Serbisyo.

Base sa ulat ng CAAP, ang bumagsak na Robinson helicopter na may registration number RP-C 4324.

Pahayag naman ni Police Lt. Col. George Calauad Jr., station commander ng Guimba Police Station, “Nu’ng narinig nila yung impact ng bagsak ng aircraft, tumawag sila agad sa police station. Rumesponde naman agad ang mga pulis doon after siguro ng mga 30 minutes.”

Sa panayam naman sa isang mangingisda at magsasaka na si George Lutao, narinig daw niya ang pag-crash habang siya ay nag-iikot sa isang palayan.

“Nahawakan ko siya, mainit pa siya… nakaupo po siya doon sa helicopter. Nu’ng ilalabas hindi ko kaya kasi meron pa palang seatbelt,” ani Lutao.

Sabi naman ni Police Cpl. Raymark Duque, sa naturang panayam, “Paglabas po ng biktima doon sa tubig, agad-agad ko po itong nilapatan ng paunang lunas. Ni-revive ko po siya. Kinalulungkot ko po na wala na po. Ginawa ko naman po lahat.”