PERSONAL na dinalaw ng TV host-vlogger na si Alex Gonzaga ang waiter na pinahiran niya ng cake sa naganap niyang birthday salubong sa Makati noong Linggo, January 15.
Ayon sa inilabas na pahayag ng waiter na nakasulat pa sa bond paper at pirmado pa niya ay humingi raw ng kapatawaran ang kapatid ni Toni Gonzaga sa kanya dahil sa mga nangyari noong birthday salubong niya.
“Last January 17, 2023 around 6:30 PM nasa work po ako. Pumunta po si Ma’am Alex kung saan po ako nagwowork,” pagbabahagi ni Allan, ang waiter na may hawak ng cake sa viral video ng “Tropang LOL” host.
Dagdag pa niya, “Then nag apologize and nagsorry siya saken tapos konting kwentuhan at sinabi ko po sa kanya na ok na po yung nangyari. Ok na po kami.”
Ang naturang statement ni Allan ay lumabas ilang oras matapos ang pagbibigay pahayag ng publicist ng Gonzaga family na si Peter Ledesma ukol sa panig ng kanilang bunso na nahaharap ngayon sa matinding kontrobersiya.
Ayon sa statement na inilabas ni Peter na ipinadala kay MJ Marfori ay “close” raw ang naturang waiter sa pamilya lalo na sa ina ni Alex na si Mommy Pinty.
Bukod pa rito ay kakulitan na raw talaga nila si Allan at sanay na raw ito sa mga biro at kakikayan ng TV host-vlogger.
Nilinaw rin daw nito na hindi naman daw lasing si Alex sa video at llong hindi naman daw niya ito gagawin kung hindi niya ito kakilala.
Matatandaang nitong Lunes ng gabi, January 16, binanatan ng mga netizens ang bunsong Gonzaga matapos mag-viral ang video ng kanyang “pambabastos” sa waiter nang pahiran niya ito sa mukha ng cake matapos hipan ang kandila.
Marami sa mga netizens ang talagang napataas ang kilay kay Alex dahil tila napahiya si Allan na ginagawa lamang ang kanyang trabaho noong mga oras na ‘yon.
At matapos rin ang viral video niya ay marami na rin sa mga kilalang personalidad maging ang mga dating nakatrabaho niya sa likod ng kamera noon ay nagbahagi ng kanilang hindi magagandang personal experiences nila nang makasama si Alex.
Ilan rito ay sina Reb Atadero, John Mark Yap, Kenneth Carpio, at marami pang iba.
Related Chika:
Alex Gonzaga durog sa netizens matapos pahiran ng cake sa mukha ang kaharap na waiter: ‘Napakabastos!’
Alex Gonzaga masama raw ang ugali sabi ng mga nakatrabaho sa likod ng kamera
Kampo ni Alex Gonzaga nagsalita na ukol sa viral video, sinabing ‘family friend’ ang naturang waiter