Bakit malapit sa puso ni Chito Miranda ang Baguio City?

PARANG batang tuwang-tuwang sa pagkukuwento ang Parokya ni Edgar frontman na si Chito Miranda tungkol sa naging experience niya sa muling pagbisita sa Baguio City.

Ngayong panahon ng pandemya, maraming mga taga-Maynila ang nangangarap na makapunta at makapaglibot uli sa Baguio na ilang beses ding isinara sa mga turista lalo na noong kasagsagan ng lockdown.

Kaya naman maituturing na ngayong bonggang bakasyon kapag nakapunta ka sa uli sa Baguio kung saan istrikto pa ring ipinatutupad ang heath and safety protocols sa mga turistang galing sa labas ng siyudad.

At isa nga sa mga local tourists na nabigyan uli ng chance na ma-enjoy ang ganda at lamig ng Baguio ay ang pamilya ng singer-songwriter na si Chito na nakahabol nga sa huling hirit sa tag-init.

Sa kanyang Instagram account, ibinahagi niya ang ilang kaganapan sa pagpunta nila sa Summer Capital of the Philippines at kung gaano siya kasaya na nakasama niya roon ang anak nila ni Neri Naig na si Miggy.

Aniya sa caption, “Salamat, Baguio. Simula nung nag-lockdown, halos araw-araw akong nanonood ng Baguio City Guide sa YouTube tuwing breakfast. 

“Malapit talaga sa puso ko ang Baguio kasi may bahay kami sa Camp Allen dati, at palagi kaming nagbabakasyon du’n nung bata pa ako,” pahayag ni Chito.

At kahit daw ilang araw lamang silang nag-stay doon ngayong panahon ng pandemya, nakapag-ipon na rin silang pamilya ng ilang memories na babaunin niya hanggang sa kanyang pagtanda at sa paglaki ni Miggy.

“Sobrang saya ko dahil na-experience ni Miggy these past 4 days yung mga ginagawa din namin dati sa Baguio tulad ng horseback riding sa Wright Park at umikot sa Outlook Drive.

“Mag-shopping at mag-inihaw na mais sa Mines View, mag-biking at boating sa Burnham habang kumakain ng indian mango, mag mini-golf sa John Hay, at maglakad lakad sa Session Road.

“Sobrang saya talaga ng mga memories ko sa Baguio, at sobrang saya ko dahil napa-experience ko din kay Miggy yung mga ito.

“Again, salamat, Baguio! Balik ulit kami soon…kapag kasama na si Cash,” sabi pa ng OPM icon na ang tinutukoy ay ang second baby nila ni Neri na kasalukuyang ipinagbubuntis ngayon ng aktres.
Ikinasal sina Chito at Neri 2014 at biniyayaan nga sila ng una nilang baby noong Nov. 23, 2016.