Pagpasa sa panukalang Department of Disaster Resilience ipinamamadali sa Senado

Hiniling nina House Speaker Alan Peter Cayetano at Majority Leader Martin Romualdez sa Senado na madaliin ang pagpapatibay sa panukala para sa paglikha ng Department of Disaster Resilience (DDR).

Ayon kay Cayetano, isa sa mga pangunahing may-akda ng panukala, ang pagapruba sa panukala ay napakahalaga para sa pagtugon ng bansa sa natural disasters tulad ng pagbaha, bagyo at lindol kahit pa sa gitna ng COVID-19 pandemic.

Nasa kamay na anya ng Senado para pagtibayin na ang landmark measure na maghahanda sa bansa na harapin ang mga kalamidad.

Umaasa naman si Romualdez na makikiisa ang Senado sa Kamara para sa tuluyang pagsasabatas ng panukala na itinuturing na mahalaga sa kapakanan at kaligtasan ng mga Pilipino.

Tiwala ang kongresista na ngayong taon din ay aaprubahan na ng Senado ang panukalang DDR.

Noong Martes, inaprubahan sa Kamara sa ikatlo at huling pagbasa ang panukala para sa pagbuo ng DDR na siyang magsisilbing national agency sa disaster preparedness, rehabilitation, rescue, response, recovery at reconstruction tuwing may kalamidad.