Plano ng MTRCB na pakialaman ang Pinoy movies sa online inalmahan ng mga producer, director

MUKHANG nababagot na ang mga taga-Movie and Television Review and Classification Board (MTRCB) dahil wala silang masyadong ginagawa sa ngayon.

Wala naman kasi silang pelikulang nirerebyu ngayon dahil sarado pa rin ang mga sinehan at kakaunti na rin ang mga bagong programa ngayon sa TV, idagdag pa ang pagsasara ng ABS-CBN.

Kaya siguro naisip nilang himukin ang Senado na bigyan sila ng power na mapakialaman na rin ang mga ipalalabas sa Netflix, iFlix, iWant at iba pang online platforms.

Ayon sa pinuno ng MTRCB na si Ms. Rachel Arenas sa panayam ng Teleradyo, “It’s not to curtail their freedom, it’s actually to empower our viewers especially now ‘yung mga tao karamihan (majority) are working from home.

“In fairness with them, they’re willing to collaborate and cooperate with us. They agreed naman that they’re going to look at our guidelines and I assured them that we’re not going to give you a hard time.”

Hindi naman daw sila kasing-higpit ng South Korea, depende pa rin daw ito sa gusto ng viewers at doon sila magbabase.

Sabi pa ni Ms. Arenas, “Iba-iba ang kultura ng bawat bansa (culture is different in every country), [in South Korea] they review every material that comes out in Netflix that’s why delayed sila ng 6 months or even a year.

“Yung sa akin kasi I don’t want na pag naririnig nila ang MTRCB nega na agad. Parang galit sila agad. Iba naman ang MTRCB ngayon, the times have changed.”

Umalma ang ilang kilalang filmmakers at producers tungkol dito.

Ang paliwanag ng producer at director na si Yam Laranas, “They have no right and it is not under their mandate. All these streaming platforms have their own stamp of ratings for specific audiences’ age group.

“These are international streaming platforms/companies that will not adhere to any local ratings or censorships. The MTRCB is just finding new ways to make a living since ABS and the movie houses are closed. This is a futile and desperate move.”

Biro namin kay direk Yam baka pag-initan ng MTRCB ang mga pelikula niya kapag bumalik na sa normal ang showbiz industry sa maanghang niyang pahayag.

“Pakialam ko sa kanila! Naniniwala ako na maraming reviewers sa MTRCB na right minded and fair,” katwiran niya sa amin.

Dagdag pa niya, “Ganito ang magiging scenario ayon sa mga streaming companies. Ayaw n’yo sa amin? Eh, alis na lang kami. Business and livelihood lost.’”

Sabi namin, mas maraming mawawalan kapag nawalan ng ibang platform na paglalabasan ang local movies lalo na ‘yung mga hindi kumikita sa sinehan.

“’Yun na nga. Kaya, wait na lang sila pag open na ang mga suking sinehan. Maliit na market ang Pilipinas kaya wag masyadong OA. Kasi, these streamers, may sariling code of conducts or quality control. Meron na silang sariling recommended ratings for every show,” pahayag pa ni direk Yam.

Ang mga pelikula ni direk Yam na nasa Netflix na ay ang “Aurora” ni Anne Curtis (Netflix worldwide), “Abomination” (iTunes US), “The Road” (iFlix), at “The Echo” (Shudder US).

Bilang abogado may alam din sa batas ang kilalang film producer at director ng pelikulang “Belle Douleur” na pinagbidahan nina Mylene Dizon at Kit Thompson na si Atty. Joji Alonso ng Quantum Films.

“Res ipsa loquitor. The law is very clear. Until and unless the same is amended by a new law, the jurisdiction of the MTRCB does not include online streaming,” diretso nitong sabi.

Palabas naman sa Netflix ang pelikulang produced ni Atty. Joji na “All of You” nina Derek Ramsay at Jennylyn Mercado na entry ng Quantum Films sa 2017 Metro Manila Film Festival na idinirek ni Dan Villegas.

Hiningan din namin ng reaksyon ang isa sa blockbuster director ng Star Cinema na si Cathy Garcia Molina.

Aniya, “Naku, no comment ako diyan kasi hindi ko alam pasikut-sikot ng law about censorship.  All I know is I am for the censorship of the porn sites na easy access sa minors.  Sana ‘yun ang pagtuunan nila ng pansin.”

Ang ilan sa mga pelikulang ginawa ni direk Cathy na nasa Netflix na ay ang “Four Sisters and A Wedding”, “A Second Chance,” “It Takes A Man and A Woman”, “Seven Sundays”, “She’s Dating A Gangster”, “My Ex & Whys.”

Ang diretsahang sabi naman ni Direk Sigrid Andrea Bernardo, “Tigilan na nila kamo ‘yan.  Pag-aralan muna mga hakbang na ginagawa.  Hindi ‘yung kung anu-ano ang naiisip.  Nakakahiyang desisyon ‘yan!”

Nasa Netflix din ang mga pelikulang idinirek niya tulad ng, “Kita Kita,” “Untrue”, at “Mr. and Mrs Cruz.”

Anyway, marami pa kaming hiningan ng reaksyon na hindi pa kami sinagot hanggang matapos naming sulatin ang balitang ito.