Angel humingi ng tawad sa medical frontliners: Patawad kung minsan ay pasaway…

NAG-SORRY si Angel Locsin sa lahat ng bayaning frontliners, lalo na sa mga medical at health workers.

Matapos ang pagdaing ng mga doktor, nurse at iba pang hospital staff sa kanilang dinaranas na hirap at sakripisyo dahil sa COVID-19 pandemic, bumuhos ang awa at simpatya ng madlang pipol sa tinaguriang mga bagong bayani.

Sunud-sunod ang pagpo-post ng mga celebrities ng kanilang mensahe ng pasasalamat at pagsaludo sa ginagawang paglaban ng mga medical frontliners sa killer virus.

Isa na nga riyan si Angel na nagpahayag ng kanyang saloobin sa pamamagitan ng open letter para sa lahat ng bayaning health workers.

Dito, humingi ng paumanhin si Angel sa pagiging pasaway kung minsan ng ilang mga Pinoy, kabilang na riyan ang kanyang sarili.

“Patawad kung minsan ay pasaway. Ngunit nais iparating, kakampi niyo kami, health workers.

“Mag do-doble ingat para makagaan sa pasanin kahit papano,” sabi ng Kapamilya TV host-actress.

Aniya pa, ang mga medical professionals at health workers ang talagang kailangan ng bawat bansa sa paglaban ng buong mundo sa killer virus.

“‘Wag sanang panghinaan ang inyong loob.

“Mahal namin kayo. Nakasuporta kami sa inyo. Kailangan namin kayo.

“Kayong mga bayani sa giyerang ito. Maraming salamat sa sakripisyo sa amin,” mensahe pa ni Angel.